樂壇幕後人包括通利工程部的音響、燈光技師，還有一群舞蹈員、和音、樂隊……全部人由去年逆權運動至現在武漢肺炎，演唱會陷於癱瘓，逾數百場騷被取消，手停口停，行業已進入生死存亡時刻！日前演出業協會與特首林鄭會面，促請政府支援業界，音樂人周博賢發問卷統計行內人損失，逾六成人自2月至今平均損失三萬收入，《蘋果》訪問了幾位幕後人，讓他們表達訴求。
採訪：皓騫
舒文 五奪「叱咤樂壇監製大獎」
歌手錯過最好時機
舒文是資深音樂人，江海迦（AGA）原定今個月首踏紅館開處女騷，都請了舒文做音樂顧問，現個唱因疫情取消。舒文說：「無論local同走埠嘅演唱會都停晒，就算歌曲製作都推遲，對全行影響唔止金錢，音樂上嘅停擺影響好深遠，每個年代應該有每個年代音樂，突然熄晒音樂，生活會乏然無味。當然面對疫情，咁多嘢停擺，先顧掂搵食係冇錯，外國都停晒，但除咗金錢、行頭上影響，另外歌手嘅機遇要講時機，升呢到紅館都要講timing，有啲歌手可能miss咗自己最好timing。」
這兩個月舒文坦言工作都慢下來：「之前傾落嘅延遲，咪慢慢做，做好佢。演唱會停擺，製作都停擺咗80%。自己暫時OK，冇去諗，用住儲蓄先，從來都係好天斬埋落雨柴，當然希望政府幫，政府啲錢都係嚟自市民交稅，應該幫返市民。」
康子妮 兼任和音及樂手
見唔到岸求助政府
林曉峰老婆康子妮的音樂造詣非常高，16歲考獲鋼琴演奏級，多倫多大學修讀音樂系，2009年開始擔任和音及樂手。「我都算好彩，暫時接咗嘅演唱會都係延遲，唔係取消，包括鄭伊健同容祖兒嘅巡唱，之前社會運動已經好多騷取消，但仲有走埠，𠵱家連呢啲都冇埋。」記者指她幸好還有老公養，康子妮卻說：「佢都冇嘢做啦，好在仲有客搵我做KOL，我哋唔係逐個月出糧，慣咗呢啲模式，有儲備唔係太驚，成日都諗最壞打算，好似當年老公喺商台節目冇咗，我哋要搬屋賣車，漏夜走佬感覺，因為試過好壞嘅時候，突然間冇晒嘢做，靠一個人收入好唔穩陣，𠵱家唔係靠佢一個，我仲有收入，所以唔係咁驚，試過上次之後，儲定搵埋落雨柴。」
一群幕後人被政府忽略，求助無門，康子妮說：「𠵱家好似見唔到岸，大家睇唔到幾時完結，都冇人幫到我哋，惟有向政府求助，有啲人只做樂手，𠵱家連酒吧都閂埋，兼職都冇埋，周博賢為業內人做調查報告，統計大家受疫情影響嘅情況，向政府求助，我都有填表。我覺得呢個疫情都係好嘅提醒，有危就有機，呢啲時候裝備自己，將來可以做好啲。」
Terry Chan 音樂監製
慶幸仍有錄音工作
為李玟（CoCo）巡迴演唱會擔任音樂總監，因受疫情影響巡唱叫停，Terry表示團隊陣腳的確被打亂：「呢年半我主要做緊CoCo世界巡迴演唱會，有好多站都要延期，大家呢個時間就休息吓。唔開得係為咗大家安全，希望疫情好快過，全部生活可盡快回復返正常。」Terry表示疫情的確令娛樂事業受到重創，不少幕後人手停口停，不過他慶幸雖暫停手頭上的走埠騷，但他仍有一些錄音工作正繼續進行。
周博賢 音樂人兼香港藝術發展局委員
同業兩月損失十萬
周博賢受同業朋友委託，進行「香港音樂/演藝/表演與相關工作同業受疫情影響調查」問卷，收集數據後建議政府為同業作出支援。周博賢說：「收到約1,800份問卷，大部份係樂手、音響工程、製作統籌，佢哋收入損失好勁，自2月初至今，損失3萬元以上近六成人，損失十萬以上有兩成半，都傾緊政府有乜幫到手，如參照藝發局嘅『藝文界支援計劃』，政府每人資助7,500元上限，雖然數目小，佢哋有部份覺得OK，純粹冇被遺棄心態，其實都幾慘，無論經濟同心理上都低落。」
Alan 入行逾30年排舞師
經歷過沙士有警號
「未來半年工作停晒，自己因為疫情而取消嘅工作有劉德華、鄭伊健、鄭秀文、草蜢巡唱，仲有2月張衞健澳門騷，真係零收入。我經歷過沙士，知道警鐘響起，有心理準備。停我覺得都係好事，要靠自己忍耐同堅持，離開惡劣環境。呢刻冇辦法，希望呢段時間過咗更加好。」由於疫情未竭止，演唱會復唱無期，Alan說：「就算以前儲到一筆錢，但未來半年、9個月內有機會都係零工作，呢一年要動用積蓄，自己要慳啲。」
身為排舞師的他冇工開，舞蹈員手足同樣手停口停，「大家都係自由身，當然有少少自己班底，但我都係受僱，做唔到任何嘢幫行內人。好在我哋有個工會，調節緊，希望政府會幫我哋，我哋唔算好大數目群體，但都需要幫助，真係冇晒收入。」
