武漢肺炎疫情全球肆虐，為咗唔好傳播病毒，各國都主張大家要「Stay home」，相信好多香港人都明白係點嘅一回事。留喺屋企，冇咩嘢做好容易食飽就瞓，瞓夠又食，體重急劇上升。唔止普通人有呢個擔憂，就連球星好似艾朗藍斯咁都驚一直留喺屋企，又食老婆嘅好餸，又食仔女啲零食，會變咗肥佬。
意甲上個月開始就因為武漢肺炎疫情失控，所以決定停擺，而效力祖雲達斯嘅艾朗藍斯亦因為遵守意國政府頒布嘅禁足令，只可以留喺屋企同老婆仔女一齊生活。藍斯最近就表示，自己雖然有跟足球會指示喺屋企做啲體能訓練，但始終都唔同真實落場比賽，唔需要keep住體重，冇刻意戒口。
連仔女餅乾都唔放過
不過近期呢位威爾斯中場就發現咁樣落去實在唔係辦法，事關喺屋企日日都好多嘢食，咁樣落去一定會變成肥佬︰「老實講留喺屋企真係好難做，因為我老婆就好鍾意煮餸，而我就好鬼為食，所以真係最佳組合。」除咗老婆煮嘅好餸，藍斯連自己仔女啲零食餅乾都唔放過︰「我有齊晒啲仔女嘅所有餅乾，然後每次飲茶都忍唔住拎塊嚟食。」對於藍斯嘅情況，可能佢都要學吓隊友基斯坦奴朗拿度（C朗）咁，就算喺屋企隔離都會繼續操肌keep住fit爆身形。不過就唔好學埋違反禁足令出街場練波，都係留番疫情好轉嗰陣先喇。
戴巴拿︰女友好得快
藍斯嘅另一位隊友保羅戴巴拿早前就好不幸咁確診武漢肺炎，之前檢測一度係陰性以為冇事，但第三次檢測又再呈陽性，都令唔少球迷擔心。呢位阿根廷前鋒最近喺ig開live就表示，同早前都確診嘅女友莎芭天妮已經接近好番晒︰「我之前仲有啲症狀，女朋友好番嘅速度就快過我。雖然要一直隔離，而且有好多未知情況，但我都保持住鎮定。近幾日我覺得自己冇咩症狀，不過一切都仲係要等檢測結果。」
同藍斯一樣，戴巴拿都已經隔離咗成個月咁耐，都坦言冇踢波咁耐，自己都好掛住足球︰「我好想再比賽，同隊友一齊並肩作戰，可以如常咁出入更衣室同埋訓練場地，好掛住嗰種打成一片嘅氣氛，所以都好希望自己可以快啲好番。」