眼見黃色經濟圈咁盛行，藍陣自然份外眼紅，經民聯九西直選議員梁美芬日前喺facebook出帖，圖文並茂話「湯好飲，劇好睇」，擺明hard sell撐警藝人楊明間賣湯舖同佢套CCTVB劇，不過似乎冇乜效果，至於會唔會反而趕客呢？就真係唔知！不過，梁美芬咁做，建制派、左報冇出聲話有問題，到有民主派區議員出嚟撐黃店，呢班人即飛撲出嚟批鬥，又話有問題又話「瀆職」喎。
網民回帶民建聯聲援元氣
話說油尖旺區議會副主席、公民黨余德寶趁復活節假期義務幫吳日言嘅「黃店」賣飯糰，結果惹嚟左報如《文匯報》攻擊，民建聯、工聯會等成員仲話佢偏幫某間店，仲指摘佢「瀆職」喎。
德寶同八方講，「鼠」玉在前，梁美芬夠喺facebook高調幫楊明間藍店賣廣告啦，點解唔見民建聯同工聯會攻擊？直斥佢哋擺明雙重標準，質疑兩個建制政黨「會唔會指摘梁美芬徇私、瀆職、對其他店舖不公平、或涉利益損形象呢？」
唔少網民喺德寶facebook留言幫拖反擊建制，Uay Nosna話：「警察都針對黃店巡查，我都見唔到公平公義」，網民Ken Wong突破盲點話：「上年十月民賤聯有呼籲過公眾多啲食元氣壽司，佢哋都有瀆職。」余德寶當然冇被嚇倒，除咗續讚吳日言舖頭嘅飯糰好食，仲讚對方唱歌好聽，齊上齊落，唔會被分化。
李八方