成場逆權抗爭社會運動可以一直延續，連登討論區發揮一定作用，唔少行動都全靠連登仔推post，仲有唔少巴打絲打一齊集思廣益，有人甚至形容係「連登治港」。上個月出獄嘅佔中三子之一陳健民（KM）亦決定要加入呢個洪流，走進連登世界，好多人關心KM會唔會去連登留言？如果KM用真名開po，整個「我係陳健民 你問我答」po，又有冇連登仔信？
KM噚日喺fb上載咗自己喺電腦前嘅背影相，話「家中年輕人教我上連登」，佢出獄撞正瘟疫蔓延時，近月都同大家留喺屋企為抗疫出一分力，呢個時候佢上連登，除咗可以解悶，仲可以知社會政治唔同範疇嘅討論風向，無疑係令佢掌握香港脈搏嘅最佳捷徑。
改網名成焦點
KM上連登消息一傳出，佢唔少朋友都既興奮又熱心，仲最關心佢究竟會改咩網名，有人就提佢一定要用假名，有人就建議一定要有霸氣，教協副會長田方澤仲留低個hashtag話「陳健民用真名上網冇人信」。八方就唔想KM上連登只做CD-ROM，希望佢早啲現身再甩埋P牌然後可以參與討論，如果係咁，有個具公信力網名就好緊要啦，不如就叫「我係陳健民」，會唔會最簡單直接呢？