不少人對張惠雅（Regen）的記憶，仍停留在HotCha階段，兩年前還以十周年紀念名義合體開騷，但其實這隊三人女子組合，早在2014年已解散。
姊妹爬山，各自努力。張惠雅自小夢想開居酒屋，結果未圓夢，卻開了一間飛機主題餐廳，今年5月已悄悄地開了兩年。沒有大鑼大鼓宣傳，一直低調轉型默默做，與Regen多年來在娛樂圈的作風，又幾一脈相承。
開餐廳和做旅遊KOL，是Regen近年的人生大計。有誰想到，一場武肺正正重擊了食和飛。「呢段時間係忍痛啲，當休息又好，自己諗清楚想做啲咩，再重新出發囉！」
小店逆境生存只能自救。Regen的餐廳是大角嘴區黃店，有不少街坊手足客撐住；被連登仔列為「黃歌手一覽表」其中一員的Regen說：「撐黃店呢樣嘢係一定要做！」
望見餐廳牆上「離境」兩個字，坐在機艙造型的座位，現實飛不了，這裏最安全。
撰文：文嘉龍
攝影：陳慧安
係佢攬炒我哋喎
都係嗰句，「冇得靠政府！」Regen說，政府的抗疫處理，由最初的「禁酒令」、「四人聚餐」、「一點五米距離」，全部都離晒大譜。「我覺得真係太離譜！其實你一開始封關，你咪搞掂晒囉，係咪先？我覺得佢完全唔聽市民意見，你去到咁耐，其實每個人喺唔同業界，所有人都有出聲，但係從來政府唔會聽我哋意見、唔會聽市民聲音！」
最新推出的抗疫基金又如何？「樂觀啲睇，好過冇囉！佢又唔諗吓有啲小店其實唔係為咗賺大錢，有啲啱啱好夠生意，或者做得開心就OK，𠵱家一嘢冚過嚟，可能得返大集團留得住囉！仲有𠵱家演藝界好多人冇工開，我識得有啲dancer停晒，咁又點呢？你見到佢之前最離譜話唔畀賣酒，封晒所有場所，但係高爾夫球場又可以照打喎，我覺得好似當我哋市民完全冇到囉，但係我哋可以做到啲乜呢，係冇嘢可以做到！」
原先打算再在同區開另一餐廳，開一間夢寐以求的居酒屋大計，又要急急煞停，「其實𠵱家係真攬炒，係佢攬炒我哋喎！其實佢有冇諗過佢咁樣去立（法）呢啲嘢，係令到全香港人都係死囉，都係瀨嘢囉！」
Regen說：「我諗對我最大影響係因為自己一直都好期待開一間居酒屋，真係講咗年幾兩年，由嗰時HotCha演唱會（十周年紀念），我已經話想開。因為有運動再有埋疫情，成個project𠵱家都擱置咗，首先都要搞掂咗呢間餐廳，先再諗第二間！」
如何逆境自救呢？Regen無奈地說：「真係唔知！喺呢個時間，我啲朋友都話盡量可以就慳啲使喇，唔好亂咁用錢呀！諗吓有啲乜嘢生意日後等疫情過咗可以做囉，呢段時間當係忍痛啲，你當係休息又好，你自己諗清楚想做啲咩，再重新出發囉！」
承受抗壓能力唔高
原先，Regen的確是出發了。她原定在4月12日出發到美國，展開她為期半年的行山大計，挑戰「美國PCT」4,300公里的狂野行。所謂PCT就是Pacific Crest Trail（太平洋屋脊步道），起點由加州接壤墨西哥邊界開始，最後到達北面華盛頓州的加拿大邊境。
「我本身其實4月12號出發，係行山出發嘅日子，要申請permit去行嗰個山，4月12號行到10月，我要行半年！其實準備咗好耐，你諗吓行半年，我要好大嘅心理關口去行呢個山，已經好興奮準備去行，但係冇諗過最後係去唔到。因為嗰半年，我要住喺山上面，即係我要自己孭晒啲帳篷同食物，但係可能我有一個禮拜至十日，要去啲村度補給。雖然我覺得件事都係好隔離，我都係唔會接觸到人，我都係喺山上面自己一個人啫，但係都有唔同地方嘅人行，都有好多歐洲人去行，首先已經驚啦，咁多歐洲唔同人去行，我去行山補給嘅時候，去到啲鎮，你又唔知道啲人會唔會歧視，見到我係亞洲人臉孔，或者唔畀我去補給，會有好多未知之數囉！」
期待已久的計劃暫停了，現在連飛都飛不了。「真係冇諗過𠵱家乜嘢地方都去唔到，我前排好想去行山，去旅行就拍啲Vlog，去轉做呢一個轉型，但係𠵱家乜都做唔到，會有啲好lost嘅感覺，因為自己好想做嗰樣嘢，變咗𠵱家喺香港乜都做唔到！我諗全香港人都係咁，𠵱家又唔出街啦，直情好似就嚟癲咗，一出街又成日要抹手，一掂到𨋢又要即刻搓，會好緊張囉個人，同埋我自己真係好鍾意去旅行，𠵱家變咗當係休息，再諗清楚自己可以做啲乜嘢囉！」
不止是旅行，Regen當初還有一個計劃是到內地學習中醫。自細已對中醫甚有興趣的她，在香港已讀了兩年中醫課程，原先打算到廣西大學，再修讀為期五年的課程。「唔知係巧合定唔巧合，我係諗住完咗都會讀啲part time，𠵱家直情係stop咗我，因為如果我要住喺內地幾年，呢段時間我都唔會諗住返到去囉，所以好多嘢控制唔到，你冇諗過自己本身正正常常去讀中醫，本身諗住去內地可以讀幾年，攞個牌定點樣，𠵱家直情諗都唔使諗！」
15歲已經簽約唱片公司，2007年以HotCha出道的Regen，其實一直有自己想法，曾經向公司「暫休」到大阪學跳舞和到澳洲打工旅遊，重歸娛樂圈再到HotCha正式解散，近年真正孤身上路。除了事業上單打獨鬥，自己的足迹亦遍及尼泊爾、西藏，背包客上路，話走就走。以往娛樂圈生活，她說自己抗壓能力低，適應不來，「娛樂圈生活，冇話鍾意唔鍾意，可能自己對呢行承受嘅抗壓能力唔高，抗壓性真係好差！自己好細個入行係鍾意唱歌跳舞，係咁簡單，但好多壓力係自己畀自己，同埋我以前唔係好識handle傳媒壓力，以前有啲狗仔隊跟，我真係會瞓唔着，會好唔開心，但係如果你食呢一行，你就要抵得渴，你要有呢個抗壓能力！」
我同屋企人都係黃
現在一個人打天下，收入起碼不用再三個人分，反而穩定了，但安全感依然不足，「所以都要靠朋友幫手，我啲朋友好好，佢哋都會成日主動話有啲乜嘢要幫你，或者有啲job又會彈畀我接吓！我覺得最主要𠵱家自己接job自由性好大，變咗我可以周圍飛周圍去，但係𠵱家變咗乜都冇喇！」
去年的運動加今年的疫情，的確令Regen有不少計劃打亂了，但她仍然無悔為運動發聲，尤其她在早期已發聲支持成立獨立調查委員會，追究警暴，而她家中，她的哥哥卻是一名警察。Regen說：「我同我屋企人，好彩都係政見一樣，大家都係黃！（哥哥都係？）哥哥都係比較藍啲㗎喇，（冇影響感情？）冇嘅，但係盡量都唔好講囉，盡量唔好講政治嘢，就算我覺得喺餐廳入面，唔會話個個政見都一樣，但係盡量會尊重返大家！」
當警察的哥哥，已經甚少見面，「其實我哋好少見，因為佢好早結咗婚搬出去，係得我媽咪、爸爸、家姐，我哋四個住，反而變咗我哋會成日喺度鬧呀，一睇電視就鬧，其實我哋屋企冇乜粗口㗎不嬲，但係最近呢半年，係講晒咁多年嚟最多嘅粗口囉我屋企，好嬲囉睇電視！（最嬲邊次？）好多都好嬲，冇話邊單最嬲，係單單都好嬲，基本上𠵱家已經有疫情喺度，但係有時你打開電話，你仲係睇到好嬲囉！最近咪講話唔識嘅人拉埋夠五個企埋一排，都罰人哋（票控），好過份囉！你睇到實好嬲㗎喎，但係可以做到啲乜嘢啫，連人哋遊行你都話我哋唔啱！」
Regen的餐廳是黃店認證，支持黃店，刻不容緩。「梗係撐啦，我諗撐黃店呢樣嘢係一定要做嘅，但係又唔可以話全部黃店都幫到手，因為我見有啲黃店真係排晒長龍，係多到不得了，但係都仲有好多黃店係冇人知，或者係好細嘅，所以真係唔知可以點俾人知，我見杜汶澤有拍《YellopenRice》，我覺得幾好，我哋呢行可以去影相打吓卡畀人知道，可以介紹吓啲黃店，我覺得呢樣嘢一定要撐囉，黃店食肆又好經濟圈又好！」
疫情籠罩，員工飯碗不能用完即棄，「我哋咁多個股東都好一致就係先確保咗員工，保障咗佢哋先係真嘅，希望呢件事唔好太耐囉，因為唔係個個都會頂得好耐，再咁落去，香港人真係死㗎喇！」對於運動，她說香港人不會忘記，「我諗大家都唔會忘記，大家只不過係因為有病要小心啲休息啫，我相信大家唔會停，大家唔會去忘記，亦都唔會去停止呢件事，一日你都唔聽市民意見，我哋都有呢個權利去發聲，都會繼續去表達囉！」
【後記】自己餐廳自己救
訪問翌日，政府再施「新禁酒令」，食肆要關閉吧枱範圍14天，Regen的餐廳自然不能幸免。她在吧枱調酒的情境，大概暫時不會再出現了。
「我都唔知點算呀真係，惟有大家守住，大家堅持囉，樂觀啲正面啲啦大家！慳啲使！𠵱家堂食都有影響，我哋都建議大家外賣，我哋會推出啲product一放落空氣炸鍋就食得！」她指住枱面上的乳豬解說。
「冇得靠政府！」都係呢句。
場地提供：The Galley by Cafe Proud Wings