武漢肺炎疫情沒完沒了，何婉盈（Elaine）與楊立門上月尾齊齊做直播節目，為逆境求存的香港人帶來正能量。疫情下，何婉盈感慨良多，皆因經歷女兒由溫哥華返港隔離及朋友染武肺離世，令她覺得「人生很化學」，而作為中華廠商聯合會行政總裁的楊立門，分析當下香港形勢亦搖頭︰「香港有排慘，我未見到曙光。」
撰文︰祖李
攝影︰陳慧安
現年48歲的何婉盈原本把女兒送到溫哥華哥哥家裏避疫，但因為當地又爆疫情，她惟有急急叫女兒回港。受訪當日，Elaine女兒才自我隔離第六天，她說︰「佢返嚟前我WhatsApp同佢講，BB我好想擁抱你，但要等多兩個禮拜。個女喺屋企隔離，我特登執咗個廁所畀佢一個人用，亦跟足指引，做家長有責任唔畀佢出街，呢種公民意識我會嚴格執行。其實佢願望成真，因為可以長期留喺房，享受自我空間。」疫情下太多不開心的事，但Elaine經常提醒自己要正面︰「疫情係一個大時代變遷，將來回望，我同女兒都會覺得係個難得經歷。」她也為女兒拍下手帶的照片︰「我喺機場接佢嗰陣，難得佢周圍一個人都冇，香港機場喎，咁疏落嘅場面，真係冇見過，我有拍低，呢啲係歷史嘅回憶、見證。」
囡囡隔離到心灰
訪問當日早上，Elaine收到一個不幸消息，有朋友因為感染了武漢肺炎離世，她說︰「我個朋友喺台灣做導遊，老家喺武漢，我哋冇咗佢消息好耐，咁啱有朋友證實佢已經離世。唉！記得前年同個女去台灣玩，佢仲幫我哋安排行程，陪我哋去玩。人生真係化學！」近日女兒受疫情影響，偶爾會情緒低落，她才驚覺困家太久，很容易迷失︰「佢由2月開始冇返學，見唔到同學仔，又屈咗喺屋企咁耐，冇同人互動，成個世界變咗，網上上堂佢好多嘢唔明，積積埋埋好多問號，令佢學習好困難，甚至學咗六年嘅法文都想放棄，我惟有開導佢。佢成日攤喺屋企，心都散埋，等佢隔離完，我會帶佢出去呼吸新鮮空氣，勸佢唔好灰，呢個只係過渡期。𠵱家約返法文老師網上上堂，等佢有返啲衝擊。」
楊立門個唱泡湯
2003年香港沙士爆發，楊立門當時仍是政府的政務主任，現在卻是商會的行政總裁，他對今次疫情憂心忡忡︰「17年前，沙士爆發時市民防疫意識唔高，我當時同北京傾緊CEPA，但後來唔可以返內地，改為視像開會，記得商務部有個同事，我哋好熟㖭，佢坐嗰班機返北京好多人感染，佢係其中一個，好彩後來好返。當年疫情兩、三個月就完，呢次好唔同。今次係全球爆發，香港仲有排慘，我仲未見到曙光。冇辦法唔灰，嚟緊失業潮，就算未有疫情，今年香港都係負增長，𠵱家冇人敢預計跌到邊度係最低點。」
疫情影響下，何婉盈本來計劃好推出的新歌，現在要押後︰「曲、詞都喺度，首歌係我人生嘅寫照，二十幾年冇新歌，想搵個完美嘅時間推出。」楊立門原本1月要開的演唱會亦因疫情泡湯，他說︰「個騷上年10月賣飛，但嗰陣社會動盪，惟有延期，後來又殺個疫症嚟，𠵱家惟有做住直播先。」兩人之後會各自約嘉賓上直播節目《星級靚聲》，何婉盈就約了黃翊及敖嘉年，楊立門則約了何天兒（前名何傲兒）。
場地提供︰工創空間