武漢肺炎喺英國大流行，蘇超早喺3月13日已經宣佈暫停，最初原定喺4月30日重開，但由於疫情持續，英國BBC報道，蘇格蘭所有足球賽事都會暫停至6月10日，意味當地至少有三個月冇足球比賽。蘇超主席Rod Petrie就話：「信息已經好明確，必須遵守政府挽救生命所採取嘅措施，球會唔可能進行復操，決定暫停所有足球比賽至6月10日，係為咗球員、職員同埋球迷嘅安全同福祉。蘇格蘭足球將為醫療人員給予鼓掌，我哋唔應該為佢哋增加任何工作負擔，特別係武肺病毒測試試劑唔多嘅時候。」BBC仲話，各支球隊會喺當地禮拜五晏晝五點進行投票，決定蘇超、蘇甲同蘇乙會否即時腰斬，但據報會喺4月23日歐洲足協（UEFA）開會後，蘇超先會正式作出決定。不過，喺上周打響「全歐第一槍」嘅比甲，原先董事會認為6月30日前難以恢復比賽，加上疫情未見好轉，決定即時腰斬19/20球季，仲頒佈榜首球隊布魯日成為冠軍，但喺禮拜四突然宣佈會推遲至4月15日先決議球季係唔係腰斬，令人懷疑同UEFA威嚇聯賽貿然腰斬將失歐洲賽席位有關。