聞說中環Jimmy's Kitchen於4月結業，另謀地方重開，最終落腳何處，目前無法肯定，看來要視乎疫情而定。特區政府實施限聚令／限枱令以後，餐廳變成黃台之瓜，何堪再摘，傷上加傷，限枱限聚令第一階段完結後，又再延期14天至4月23日，即是說餐廳在整個4月都要蝕錢眼光光。
周一飯局召集人賓架P講：「Jimmy's Kitchen就快拜拜，大家去食番餐好唔好？」眾人皆曰好，但公子L自外國回來，自我隔離14天，唔嚟得，日本通船務A年初去咗日本，滯留不能回港，又有老友要維持social distancing，日日唔出街，卒之得五人報名參加，分兩張枱坐。左丁山與老總E坐一枱。老總E本已退休，偏偏公司有兩位董事因不同理由離休，又有要員另有高就，老闆唔夠人用，於是急召老總E復出，職責比總編輯更繁重。人生就是如此離奇，退休回家治理身體嘅老總E校友，竟然會因緣際會復出孭重飛，似乎上天早有安排。
老總E不是Jimmy's常客，問有乜招牌菜，賓架P話係德國豬手，於是落單四份，伙記話只剩下三份，中貿林改吃馳名咖喱，左丁山就叫咗1928年上海開業時已有之Beef Stroganoff跟飯。老總E見到份德國豬手，嚇咗一跳，因份量之大，足夠兩人分吃，於是切咗四分之一畀左丁山，中貿林吃完老牌咖喱，有感而發：「昨日之日不可留，今日之日多享受，咖喱加豬手超一流！」跟住話要約埋楊社長再來一次吃晚飯，把美好情境留在腦海中。
此日占美廚房食客十分疏落，人客一眼望晒，與昔年坐得密麻麻之狀況，大不相同，大馬主C恒常坐在佢嘅長枱，想見佢唔使預約，每日中午到占美就可以見到。去洗手間洗手，居然碰到陸羽常客公子K，公子K嘆曰：「搵食艱難，現在陸羽冇得去，占美又話結業，你明日去邊度食飯？」公子K日日在陸羽打躉，陸羽暫停營業若有所失，是日改來占美，又生感慨。肺炎疫情再延續到暑假仍然不散嘅話，中西日泰韓各款餐廳，必然執笠不少，香港呢個美食之都外號要自除招牌。餐廳午飯時間咁少客，返工人士去咗邊？地產代理高人馬主W對左丁山講：「我哋個個盡量買外賣，在公司食，盡量不外出！」唔怪得好耐冇見過佢在嶺南會所出現，但食外賣又產生一個問題，左丁山之辦公室助理嘅朋友在大公司做清潔，向人呻到樹葉落：「公司現時有太多發泡膠飯盒，又有硬膠盒，職員連湯水全掉落垃圾桶，我清理得好辛苦。」此亦是環保問題，大量塑膠垃圾由此而生，黃錦星局長當睇唔到便是！