目前各大聯賽停擺，球會除咗唔知幾時重開球季外，仲要應付疫情影響下嘅經濟危機。不過，西甲球會巴塞隆拿要面對嘅就唔只經濟危機咁簡單，早前先同美斯等一隊球員因為減薪問題搞到立立亂，近日高層仲地震，董事局中有六名董事辭職，其中包括兩位球會副主席，目的就係要逼主席巴杜美落台，而球王美斯同日雖喺ig澄清自己唔會轉會國際米蘭，但唔見佢有講多一句會效忠巴塞嘅宣言，睇嚟同球會間嘅關係冇大改善。
六董事辭職逼主席落台
早喺禮拜二，巴杜美已經要求兩位副主席魯沙特及湯巴斯辭職，到禮拜四，2位副主席連同4位董事公開表示已經辭任，當中有四人早前曾經要求過巴杜美落台。今次六位董事辭職可以話係巴塞高層嘅大地震，事關巴塞董事會由19人組成，根據會章董事會運作最少要有14人，喺六人辭職下，巴杜美必須再額外委任多一名新董事先可以正常運作。
六位辭職嘅董事喺聯署聲明中就話，佢哋喺傳媒中得知巴塞請「五毛」唱衰球隊，做法令人難以接受，認為應該要炒咗涉事人物，仲強調想透過今次集體辭職去改變球會嘅管理模式，希望疫情過後可以盡快舉行選舉，選出新一任主席帶領球會。
除咗之前球會被踢爆搵啲網絡打手唱衰球隊外，早排球會為咗要球員減薪都搞到同球員反晒面，最後要隊長美斯發聲明表示一班球員同意減薪七成，仲話唔明點解球會要用輿論壓力要脅球員。不過，有指雖然一隊球員肯減薪，但球會仍然唔會支付員工薪金，要佢哋放無薪假，近日仲俾西班牙傳媒踢爆，巴塞已向政府申請臨時僱傭條款（ERTE），球會將有309名員工轉為臨時失業狀態，喺4月14日開始領取國家救濟金。
囚友搞BBQ歡送細哨
美斯同球會高層嘅關係越嚟越差，唔少傳聞都話佢可能會轉投意甲國際米蘭或返阿根廷加盟母會紐維爾舊生，不過美斯近日喺ig親自fact check，證實呢啲都係fake news。早排仲有傳美斯為身陷牢獄嘅前隊友朗拿甸奴交160萬美元（約1,240萬港元）保釋金，佢都有喺ig表示呢單係假新聞。
不過，日前朗拿甸奴已保釋成功，正住喺巴拉圭四星級酒店接受警方監視。報道仲話原來一班囚友知道「細哨」要離開監獄後，都好唔捨得呢位前巴西球星，於是專登幫佢搞咗場BBQ送別會。細哨仲喺臨走前向囚友承諾會喺返巴西前去探佢哋。