英超聯賽停擺，早前熱刺前鋒孫興民就以私人理由向球會申請返家鄉南韓，之後球會證實呢位南韓球星將會接受四個禮拜嘅軍事訓練。近日就有英國傳媒揭露孫興民返到南韓之後要接受咩訓練，當中有一樣係近大半年香港人非常熟悉嘅嘢，就係喺完全冇任何保護之下聞住催淚彈（TG）呼吸。
今次孫興民將會參與濟州海軍隊為期四周嘅軍事訓練，雖然只係短短四星期，不過都相當認真。首先孫興民就要剃番個類似近期大熱嘅韓劇《梨泰院Class》朴敘俊「栗子頭」，之後就要參加好似《愛的迫降》玄彬咁嘅實彈射擊訓練、又要做30公里嘅負重行軍，之後作戰演習同埋紀律訓練教育呢啲都唔少得，真係聽落都覺得辛苦。
眼淚鼻涕口水齊流
不過當中最慘烈嘅係，軍隊要求士兵入去一間充滿催淚氣體嘅房，然後除低豬嘴，要喺入面練到如常呼吸。有指好多士兵訓練完之後都係眼淚、鼻涕、口水一齊流，相信香港人對呢個畫面都相當熟悉。四個星期嘅軍事訓練雖然時間唔算好長，但都有一定嘅危險同難度，而孫興民冇耐前先因為手臂骨裂而接受手術，據指熱刺都會同佢保持聯絡，避免佢因為軍訓舊患復發。
孫興民就話返咗南韓軍訓可以操吓體能，佢一班喺英國餓波嘅隊友，竟然喺領隊摩連奴嘅帶領下，違反當地政府頒佈嘅「禁足令」，喺公園練波，仲要着晒熱刺訓練波衫驚死人哋認唔到，結果被人拍片踢爆，惹嚟外界批評。
摩佬違禁練波認衰
有網友影到摩佬同達雲臣山齊士、賴恩施斯隆、尼當比利喺公園內進行訓練，而且冇保持兩米社交距離。有一位消息人士提到，摩佬最大問題係過份投入工作，佢之所以會帶班球員去練波，目的只係希望可以協助球員改善佢哋嘅表現。
目前呢位葡萄牙籍領隊已經承認自己做錯，而且會做番個好榜樣，佢為呢件事向大家道歉：「我承認我同球員去練波係違反咗政府規定嘅「禁足令」，呢段時間我哋應該只可以留喺屋企同家人接觸。喺呢個關鍵時刻，人人都要履行自己嘅職責，聽取政府意見，去支持英國國民保健服務（NHS）嘅英雄。」