前利物浦左閘懷斯同女兒周二喺挪威遇上交意外，雙雙送院檢查，好彩冇大礙，觀察一晚後已經出院。外電報道話，現年39歲嘅懷斯喺當地時間周二晚上，揸車同19歲長女亞莉安娜返屋企時，因為閃避路上障礙物，扭軚撞向路邊圍欄。消息指，兩人喺救援人員抵達時意識清醒，未有嚴重受傷，但仍需送院接受檢查，但肇事車輛就嚴重損毀。懷斯嘅經理人巴基向挪威傳媒透露，兩人目前情況良好：「懷斯當時正接送女兒返阿里辛特，但喺差唔多抵達目的地時，路上出現突發情況，懷斯即時扭左軚避開，結果撞到路邊圍欄。佢哋情況好好，留院觀察一晚就可以出院。」當地警方正就意外進行調查。