武肺肆虐下有唔少球星都中招，36歲嘅前荷蘭國腳、喺上年退役嘅洛賓雖然倖免，但日前就透露壞消息，話佢太太比娜迪安早前確診染上武漢肺炎，不幸中之大幸係目前已經康復，同埋洛賓本人同佢哋三個仔女都冇受到感染。洛賓職業生涯曾效力過燕豪芬、車路士、皇家馬德里同埋最後一站拜仁慕尼黑，上年喺效力咗10年嘅拜仁退役。洛賓早前仲好風騷咁參與拜仁一隊球員嘅集體視像操練，當時佢笑容滿面，以為佢成家都好健康，估唔到原來佢老婆出咗事，洛賓話：「（武肺）病毒無處不在，我太太早前檢驗呈結果陽性。好彩佢已經康復，雖然仲有啲唔舒服同呼吸困難，但情況已好番好多。」老婆出事後，包括洛賓同其他家庭成員都有遵守隔離指引，先避過全家中招嘅災難。