【娛樂人物】
淡出螢幕26年的吳啟明近年轉做大廚，原來年少時有歌手夢，他也一直有低調玩音樂。疫情下人人憂心忡忡，身為基督徒的吳啟明為復活節創作了一首英文歌《I'm Your Child》，並開金口與雷深如（J.Arie）合唱。吳啟明還不惜工本找來強勁幕後班底配樂及拍攝MV，用歌聲為大家打氣。
撰文：比華利
攝影：陳俊強
現年56歲的吳啟明最令觀眾印象深刻的，就是1992年的劇集《大時代》中「丁旺蟹」一角，不過他在兩年後離開娛圈，前年轉型在上環開食肆做大廚。走出廚房的吳啟明最大興趣是玩音樂，他前年創作的歌曲《Falling Down》，去年更被韓劇《觸及真心》選為片尾曲。身為基督徒的吳啟明，去年聖誕與J.Arie合唱聖誕歌《This Baby》，兩人一拍即合，復活節臨近，兩人再添食。
飲醉作曲
音樂發燒友吳啟明近日推出英文歌《I'm Your Child》，不只包辦作曲、編曲、填詞和演唱，還不惜工本斥資6位數字製作，歌詞中充滿正能量，疫情下為大家打氣。吳啟明除再邀J.Arie獻聲，今次更找來跟鄧紫棋和李玟合作過的美籍鼓手Padget Nanton III、低音結他手Marcus和色士風老師Miles的強大音樂班底合作，音樂總監則是蘇道哲。他們日前盡情在錄音室內「發燒」，吳啟明都技癢開金口，吳啟明首先錄唱個人部份，他稍稍試咪後便投入錄音，他接受《蘋果》訪問時說：「有feel因為首歌係我作。」
講到新歌在甚麼情況下創作？吳啟明直言：「作曲零開始到變成一首歌，我用咗大約20至30分鐘完成，有晚半夜我飲醉咗，喺鋼琴旁邊作咗出嚟。」吳啟明馬上找人填詞，但看過歌詞不太滿意，最後自己出手：「我唔太識中文，只有填英文歌詞，我最欣賞林夕。」至於今次開金口，他說：「開會嗰日，女歌手冇嚟，我自己用咪試唱一次，大家事後將我同J.Arie把聲mix埋一齊，佢哋話好夾。合唱歌通常五五咁分，但今次係我三佢七，我把聲會填返佢啲低音位，似和音。」
唔慣拍MV
吳啟明26年後「復出」幕前，他笑說：「真係歲月催人。」埋位拍攝MV首天也有不習慣：「可能人老咗，唔慣四面打燈，眼有啲唔舒服，但都好快適應到。」以新歌班底計，製作費最少都要6位數字，他說：「煮餸都要買靚料，唔可以觀音頭掃把腳，今次碌盡人情卡同credit卡。」
今次出新歌，吳啟明是否想由揸鑊鏟轉為揸咪？他說：「有朋友同我講，仲做到就做，否則將來後悔，我諗完決定盡情玩音樂，但我冇才華做歌手，唔揸咪。」吳啟明坦言年輕時真的夢想做歌手：「我覺得做歌手好有型，𠵱家唔想做，可能係老咗，唔想咁遲先做，但唔減我對音樂熱誠。」J.Arie已第二次在音樂上與吳啟明交流，她說：「我哋透過寫歌嘅朋友認識，啟明哥要求好高，係完美主義者，𠵱家好少人咁揼本去做歌，我哋平日最多用電腦篤出嚟，但佢會請晒樂手，咁book法真係好甘。」
