歐洲足協（UEFA）上月中決定推遲原定於六月舉行嘅歐洲國家盃，不過推遲一年亦衍生唔少問題，或令UEFA呢個多國合辦計劃胎死腹中。原定今年上演嘅歐國盃為慶祝歐國盃60周年，UEFA將賽事改成由倫敦、羅馬、慕尼黑等在內嘅12個歐洲城市合辦。不過，意大利、西班牙及德國等有份主辦賽事嘅國家，確診武肺人數已經突破10萬，據報意大利同西班牙對疫症過後仲可唔可以合辦賽事抱懷疑態度，仲話可能「縮沙」讓出合辦權㖭！另外，各國足總寄望來年疫情過後舉辦友賽、表現賽，甚或演唱會等大型活動提升收入，但歐國盃延後一年搞到撞晒期，據指英格蘭嘅溫布萊球場、蘇格蘭嘅咸圃頓球場，以及荷蘭嘅阿姆斯特丹球場都面對同樣問題，令各國足總對合辦歐國盃態度有變。