特首林鄭月娥前日下晝召開記者會公佈第二輪防疫抗疫基金新措施，開始之前發生一段小插曲。話說成班高官例牌一字排開、一個跟一個咁埋位，點知政圈盛傳嘅「下任特首黑馬」、商務及經濟發展局局長邱騰華疑似心急得滯，竟然「搶閘彈出」，仲要行咗幾步先發覺冇人跟住，急急掉頭「重新入閘」。現場記者見佢咁勇，自然笑聲四起，仲有記者忍唔住講咗句「林太都未行」，不過原來佢提早出閘，隊友羅致光要負多少責任。
行喺邱騰華後面嘅勞福局長羅致光噚日喺電台為隊友解畫，話自己對邱局長「出錯閘」都有責任，估計可能因為自己臨行出去之前同邱局長講過：「你個位喺最前。」就係呢句令佢心急行前，咁就變咗「搶閘彈出」。之前喺立法會大大聲話「對自己崗位以外嘅職位冇任何興趣」嘅邱局長，今次唔知算唔算「露出馬腳」呢？