特首林鄭月娥前日公佈第二輪防疫抗疫基金，包括資助薪金計劃，為僱主支付員工薪金一半，每人每月上限9,000元。有關計劃公佈不過一天，政黨、工會即炮轟計劃充滿漏洞，有工會及政界中人不約而同對季陶表示，計劃表面上是「保就業」，實際是「保老闆」，「成個計劃表面上係幫打工仔保住份工，實際就係送錢畀老闆，打工仔從中有冇得益？政府根本唔在乎。」
有政界中人指，其實在政府計劃底下，只要僱主申請津貼後不解僱員工，所有津貼便可袋袋平安，「即係話之後點保證打工仔可以受惠、可以分享到嗰9,000蚊，甚至唔俾人減薪、放無薪假？政府根本唔會理，只係叫僱主唔好炒人」。
「造靚條數」向京領功
該政界中人指林鄭的最終目的只是要補償那些大企業，「你計吓啲大集團，好似美心咁，計埋有成過萬員工，呢筆數隨時過億」，同時港府可「造靚條數」，令失業率不會大幅上升，「到時又可以向北京領功，至於打工仔有冇被剝削？關佢乜事！」
有工會中人更指出，從勞工及福利局長羅致光昨日在電台節目指，可能會有僱主因為取得津貼而增加人手或加人工，就知他是如何離地，「唔夠人手只會叫人開OT，𠵱家咁多人失業，仲話加人工？炒咗高薪請個平，再食盡政府啲津貼就有」，而且計劃又對之前被炒而失業的人士，又或已放無薪假的員工毫無幫助，「因為林鄭要班大老細支持，唔係打工仔，只係借保就業之名去向大老闆輸送利益。」
周一、三、五刊出
季陶