政府前日推出咗第二輪防疫抗疫基金，榮獲「全球第二高薪領導人」嘅林鄭都似乎敵唔過巨大民意壓力，宣佈同司局長減薪一成，有人隨即將矛頭指向立法會議員，不過唔同黨派都有唔同立場同做法，好似公民黨講到明唔想將人工畀返政府，寧願直接將啲錢捐畀黃色經濟圈，幫助有需要嘅抗爭者。不過議員嘅答案就似乎考起咗啲「異常邏輯思考」嘅左報記者啦。
網民︰這是正式錄用的記者嗎？
話說前日AY同譚文豪、郭榮鏗三個人見記者，自然俾人問到捐人工問題，AY講明對捐錢持開放態度，但一定唔畀返政府，就算捐，都會照顧有需要嘅人同黃圈。呢個時候，有左報記者追問：「點解你淨係畀黃色經濟圈？全港市民都受緊苦㗎喎！點解要用公帑啲錢？」咁AY好聲好氣答佢：「啲錢係我哋，係畀咗我哋嘅薪水嚟。」左記再追問AY：「啲錢（人工）畀咗你就係你㗎嗱？」AY等人聽見佢咁講，三個人好似合唱咁「吓！吓！吓！」咗三聲，AY話：「對唔住，我唔係好明你個邏輯，諗清楚大家。」
呢條「異常邏輯思考」嘅左報記者提問片段，網上立即瘋傳，有網民講笑：「這是正式錄用的記者嗎？」又有網民話，原來老闆出份糧畀你，唔係你嘅，唔知個記者用自己份糧之前，係咪有問過老闆？
李八方