商經局邱騰華離689 2.0愈來愈近，以「憑感覺」，「我覺得」，就地正法打殘香港電台。議員扮做佢肚裏蟲，問邱局長係咪想做未來特首。未來口罩，得啖笑。未來特首，即是林奠忽然被柒，搵件茂李上位坐住先，唔慌坐得長。陳智思這類叻仔當然敬謝不敏，張司長騰雞唔止一次向黑警道歉，還上？冇可能。唯邱局長頂得住，心肺紅。局長話「依家無興趣」，正面看，就是興趣之改變「存在極大空間」。
邱局長踏上2.0台階，要學侵總統，如何界定鳳凰衛視女記者那句No, I work for HK。侵侵問「是否幫中國工作」，記者說不，我幫香港。還說以香港為基地。邱局長眉精眼企冇理由蠢得過世衞那位裝聾收線幹事，這件鳳凰，披住港獨羊皮，邱局長唔係feel唔到，是暫時裝遲鈍，針對港台放生鳳凰。但只要有機會，會學林奠，向阿爺打小報告，將鳳凰剝皮。侵總統與習大帝的共同敵人都是傳媒，邱局長人愈紅心水愈清，香港只需要戰狼五毛，唔需要言論自由，特首辦新聞主任都要被迫跳樓。好了，問世衞，睇香港電台抑或鳳凰……喂喂，野味……不？噢，又咳線。