男團MIRROR成軍以來，隊員各自出單曲、開騷和拍劇，其中陳卓賢（Ian）的第三首個人單曲《正式開始》早前趁情人節面世，MV更飛到日本拍攝，不過卻因此被其他成員的歌迷留言鬧資源分配不均。Ian日前在尖沙嘴接受《蘋果》訪問，他說：「其實呢個MV係MIRROR入面最平嗰個，導演同隊crew本身喺日本，花姐（經理人黃慧君）陪我坐廉航凌晨機過去拍兩日就返，佢平時坐商務，今次同我逼廉航過去。」
歌迷互罵尷尬
作為男團成員，歌迷互罵屢見不鮮，Ian強調成員間互相理解︰「我哋明白歌迷心態，甚至有時網上會有罵戰，我見到都尷尬，但大家都理解有時控制唔到，所以唔會影響大家感情。其實公司會安排唔同嘅成員有唔同嘅工作同發展，自己冇理太多，做好自己。」新MV是以女友視角拍攝Ian的靚仔樣，早前更安排在銅鑼灣時代廣場大電視首播，明顯是冧歌迷之作，然而因為疫情影響，宣傳計劃很多都做不到，要改為網上直播。
對於外間經常將他和姜濤比較，Ian指皆因大家都是由《全民造星》捧出來︰「佢係冠軍我係亞軍，成日有人問我攞第二會唔會好唔忿氣？比賽完入咗男團都繼續講，坦白講我當佢細佬，佢當我阿哥，之前一齊宣傳，我成日湊佢，佢成個小朋友咁，好大頭蝦，試過着鴛鴦鞋出嚟，又成日漏低嘢要幫佢拎，我覺得照顧佢反而仲攰。」
調整自己心態
Ian明白將來難免會跟姜濤繼續被比較︰「大家覺得我哋係競爭對手，但我哋其實視對方為partner拍住上，大家唔同風格、路線，佢係好sharp、好有舞台魅力嘅跳唱偶像，我就係斯文會創作同自彈自唱，但我哋唔係敵人。」他表示除告誡歌迷外，最重要是調整自己心態︰「佢哋嘅言論我哋要過濾，如果太認真會唔開心，然後嬲埋隊友。」
撰文︰曹家誠
攝影︰沈健程
化妝︰Cori of annie g makeup centre
髮型︰Private I Salon Stone
場地提供︰Harlans Bar and Restaurant