天意總是弄人！原本充滿希望，事業快將走上軌道的少婦，在成功前一刻突然被癌細胞摔倒失蹄。雖然她積極治療，但兩年間由初發乳癌，到後期不斷的復發，現時癌細胞已擴散至肝與骨，目前她正被胸腔內的癌細胞折磨至睡不安寢。近月她接受中醫治療後情況有所好轉，但中醫費用高昂未能負擔，希望有心人伸出援手，讓她可以繼續治療，減輕痛楚。
記者：廖怡德
今年33歲的阿Ling，大學畢業後在建築工程公司任職材料採購員，2012年時，她與任職裝修工人的丈夫結婚，公一份，婆一份，兩夫妻生活尚算過得去。因工作獲上司賞識，阿Ling報讀浸會大學的物資採購與供銷學課程為自己增值，但課程讀至一半，身體開始響起警號。「2017年10月尾嗰時摸到左邊乳房有個硬塊，即刻去睇醫生，醫院轉介我去出面做乳房超聲波同造影，發現我有個陰影有4到5 cm，即刻去醫院見醫生，跟住11月頭瑪嘉烈（醫院）安排我做抽針，發現結果係惡性腫瘤。」
發現患癌，阿Ling的人生從此改變，浸會大學的課程被迫退學，工作也被迫辭掉，但癌魔卻沒有因此放過她。「12月20日開始做化療，做咗八次化療做到2018年5月，6月做手術局部切除左乳腫瘤，做完手術等個傷口埋，8月開始做電療，做咗31次電療，9月結束咗，12月覆診，當時照乳房超聲波造影，發現又有新陰影……」
一癌未癒，一癌又起。阿Ling右邊乳房竟然發現新的癌細胞，為此阿Ling做手術局部切除右乳房，同時進行21次電療，不過癌魔似乎有意玩弄阿Ling，進行右乳療程後，又輪到左乳的癌細胞復發，阿Ling最終將左乳全部切除，但癌細胞又轉移至盆骨、胸腔和肝，短短兩年間，阿Ling的癌細胞「老是常出現」，換成一般人或許早已心灰意冷，但為了丈夫和家人，阿Ling仍然堅持下去。
其實阿Ling確診患癌後，已經按醫生囑咐服用抗荷爾蒙藥，藉藥物改變體內荷爾蒙的環境而抑制乳癌，為此她要強制停經，錯失懷孕的機會，但換了數種抗荷爾蒙藥仍然未能控制癌細胞，目前醫生已安排阿Ling服用標靶藥，但對阿Ling來說，現時對她最痛苦的事莫過於睡不安寢。「胸腔個腫瘤有2.5cm，就喺肺膜前面，所以影響我夜晚瞓覺，如果我個人平躺係痛到好犀利，完全係瞓唔到，所以我個人一定要打側瞓，背脊墊一隻公仔，隻手再伸（前）先可以瞓到，但其實都係好痛，但係比平躺好少少。」
阿Ling為此求見醫生尋求解決辦法，但醫生只是着她服止痛藥，「因為痛得太犀利，我嗰時一日要食五至六片止痛藥，我兩個鐘就要食一次，瞓兩個鐘醒咗食一粒，跟住瞓着咗痛醒又食一粒，到3月頭醫生開咗一種新止痛藥，食完會嘔同頭暈，醫生都有開啲止暈同止嘔藥畀我，一開始嗰兩日有食，其實效果又唔係特別大，半夜都係會醒，而且好辛苦，有一日嘔成三四次，不停嘔又頭暈，所以我都唔敢再食……」
因止痛藥的強烈副作用令阿Ling難以忍受，為此阿Ling的哥哥不斷尋求醫法，在讀到一本關於中醫治癌的書後，建議阿Ling去試一下。「當時已經冇晒其他辦法，就諗住去試吓。搵到個中醫師之後睇咗兩次，第一次開咗一個禮拜藥，我原先食五到六片止痛藥，食完嗰一個禮拜藥，夜晚瞓覺食一粒就ok。跟住睇第二次，食咗三日藥，開始已經可以唔使食（止痛藥），雖然仲係痛，但我都忍到唔使再食止痛藥。」
阿Ling自覺中藥治療有效，但奈何中醫療法一個星期治療連藥費約7,000元，對她來說十分吃力。「因為我2017年病咗之後其實都冇再做到嘢，得我先生一個人做嘢，佢做裝修，因為呢份唔太穩定嘅收入，所以如果每個禮拜4、5千蚊費用其實對我哋負擔好大……但係我睇咗第一次，感覺真係個痛楚減輕咗，止痛藥食少咗，所以我希望可以一直睇落去，想各位善長仁翁可以幫幫我。」
阿Ling希望善長能幫她，因為她很想有機會可以報答與陪伴在她身邊不離不棄的丈夫。「其實我有呢個病之後都係我先生一個人負擔屋企家用，一直以嚟佢都冇話怨我，一直好努力去搵錢，令我食到多營養嘅嘢，唔會話虧待我，所以我自己好愧疚，佢都咁努力去醫我呢個病，所以我自己都唔好放棄，中醫又好，西醫又好，總之要令到自己可以生存耐啲，可以陪佢耐啲。」
「阿Ling」現無力負擔中醫藥費，請支持她，使她能抗癌。「蘋果日報慈善基金」關顧主任正關注她的情況。
「阿Ling」暖流之友編號：C4692
網上捐款： http://bit.ly/applecharity
想知最新蘋果基金動向？即like fb： http://www.fb.com/adfundhk
「蘋果日報慈善基金」聯絡方法：
電話：29908688
傳真：23076307
電郵：mailto:[email protected]
WhatsApp：98627828
網址： https://hk-charity.nextmedia.com
免費專區網址： https://hk.appledaily.com/free/adfundhk
facebook專頁： http://www.fb.com/adfundhk
YouTube頻道： http://www.youtube.com/adfundhk
「蘋果日報慈善基金」捐款方法：
– 以PPS或信用卡作網上捐款： https://bit.ly/applecharity （註：單一PPS慈善捐款金額不能超過港幣五千元正）
– 銀行存款：
滙豐銀行：580-198836-001
恒生銀行：368-006565-001
東亞銀行（往來戶口）：015-514-68-01678-5
– 現金捐款（OK便利店）（向店員表示捐款至「蘋果基金」）（註：單一EPS慈善捐款金額不能超過港幣五千元正）
– 填妥捐款表格透過VISA、MasterCard或AE信用卡捐款
– 港九新界7間華星冰室分店之捐款箱
如讀者市民捐款至醫療專戶，請於入數紙／支票背面寫上S0003專戶編號，然後電郵／傳真／WhatsApp訊息／郵寄予本基金。
如捐款至指定暖流之友（受惠個案），請於入數紙／支票背面寫上其暖流之友編號，然後電郵／傳真／WhatsApp訊息／郵寄予本基金。
「蘋果日報慈善基金」於一九九五年成立，乃根據《稅務條例》第88條獲豁免繳稅的慈善機構。基金除接受市民捐款外，亦接收《蘋果日報》捐出的1%盈利作為善款，以幫助有需要的人士和資助有意義的社會及教育活動。基金一切行政費用均由《蘋果日報》支付，善款的一分一毫，將全數用於暖流之友所需。「蘋果日報慈善基金」務求按照善長意願，把善款轉交指定暖流之友。然而個別暖流之友可能因長期離港及搬遷等情況以致失去聯絡，甚或暖流之友已經逝世或拒收捐款，有關善款將撥入基金作其他慈善用途。