受到武漢肺炎疫情拖累，全球體壇幾乎癱瘓，英超各大球會亦紛紛陷入財政困難，喺收入大減嘅情況下，已經開始吹風要減薪。媽媽啱啱亦因為患上武肺而病逝嘅曼城領隊哥迪奧拿，聽講就已經同意減人工，等球會留番啲錢出糧畀其他員工，真係有情有義。曼城禮拜一喺球會官方網頁宣佈，哥帥媽媽莎拉不幸喺西班牙巴塞隆拿感染武肺離世，享年82歲。就喺呢個悲痛嘅時刻，年薪有成2,000萬鎊（約1.9億港元）嘅哥迪奧拿，據報將會喺返番英國之後落實減人工，而曼城就會用慳出嚟嘅錢，出糧畀其他員工。除咗哥迪奧之外，行政總裁蘇里安奴同埋足球總監碧格列斯坦等多名曼城高層，都會加入減薪行列，同球會共度時艱。藍月亮早前已經講明，停擺期間會出足糧畀所有員工，仲唔會接受政府一分一毫嘅補貼。
