武漢肺炎肆虐全球，但777啲抗疫措施永遠慢三拍，全城都怒轟佢抗疫不力，加上一時一樣嘅禁令，更令唔同行業怨聲載道，驚頂唔住要裁員執笠。呢個時候，就有一個人決定「挺身而出」，星島新聞集團主席何柱國噚日喺自己旗下兩份報紙登頭版廣告，向777陳情，叫政府代付全港打工仔人工減少民間疾苦。
何柱國用頭版廣告向特首「呼籲」，絕對唔係新鮮事，好似今年情人節，佢就用全版出咗封「情書」畀777「溫故知新」，重提777兩年前嘅講過「拭目以待」同埋「如沐春風」嘅往事，仲嘲諷777「拭目以待」最終變「佢個品牌一落萬丈」，「如沐春風」變市民「如沐寒風」，冇好日子過。
杜汶澤：五大訴求就聽唔到
今次何柱國喺《頭條日報》同《星島日報》個頭版廣告，開首就用「我最尊敬的、敬重的林鄭特首」去稱呼777，內文話現時香港百業蕭條，民不聊生，港人心情「壞透了」，促請佢「運用智慧」，甚至唔使「創作」新招，只需「學一學」其他政府代付打工仔兩個月人工，仲話「權在你，建議在我。我們拭目以待」，而下款就落「心情悲痛的何柱國」。
何柱國出完廣告，777即減薪同代付打工仔兩個月人工，杜汶澤就話睇吓政府幾怕啲大粒佬吖！何柱國出個A1廣告叫佢減人工，佢即刻減。「二百萬人上街，五大訴求，聽唔到。香港政府只不過係權貴嘅走狗嚟啫！」有網民就認為，封信行文咁有特色，應係出自何柱國手筆，而噚日下晝777出嚟宣佈咗一系列措施，包括真係幫僱主畀啲人工，但同何柱國個建議唔同，唔知有冇令佢悲痛心情好番啲呢？
李八方