一代巴西球王朗拿甸奴生活不嬲多姿多采，點知上個月因為用假護照入境巴拉圭，同阿哥兼經理人羅拔圖一齊俾人拉咗，仲無啦啦被捲入一宗洗黑錢案，搞到要還柙候審。喺監獄踎咗超過一月後，佢哋禮拜二終獲准以160萬美元（約1,240萬港元）保釋出冊，雖然要軟禁喺當地一間豪華酒店，繼續接受監控，但總算可以嘆住坐監，得閒仲可以叫個外賣㖭。
曾協助巴西贏得2002年世界盃冠軍嘅細哨，喺18年因違規起學校，又唔肯交罰款，結果俾巴西政府沒收咗護照。上月初佢同阿哥兼經理人羅拔圖就利用假護照，一齊去到巴拉圭出席慈善活動，順手推廣吓自己本新書，點知就被人拉咗。
細哨解釋話本護照係一個作為活動搞手嘅商人畀佢哋嘅禮物，法官就指事件涉及洗黑錢，案情非常嚴重，加上兩人有潛逃風險，所以將佢鎖喺當地首都阿松森一個專收重犯嘅高度設防監獄，令細哨要喺獄中度過40歲生日。
被爆強顏歡笑好擔心
雖然細哨喺監獄入面冇特權，最多只係可以食由律師帶嚟嘅外賣，唔使食監獄嘅飯餸，但話晒都係球王，佢就算淪為階下囚都一樣大受歡迎，而且一樣有波踢，又贏埋嗰度一個五人賽冠軍。佢仲成日俾人影到喺獄中露出招牌笑容，不過最近去探過佢嘅前巴拉圭國腳古華斯，就大爆細哨只係強顏歡笑，內心其實不知幾擔心單案，仲一直希望盡快獲准保釋外出。
若罪成隨時踎多五年
負責處理案件嘅法官阿馬利就話，由於調查進度較預期中理想，加上朗拿甸奴兄弟要大嗱嗱交成160萬美元保釋金，應該唔走得去邊，所以就批准佢哋保釋候審。喺法庭頒令之後四個鐘，佢哋就由警車載到當地嘅豪華酒店Palmaroga接受軟禁，其間可以接受探訪。
由於武肺疫情嚴重，細哨要先消毒至入得酒店，佢到埗嘅時候仲同一個女人攬到實慶祝。不過，佢單案仲有大把手尾，如果最終罪名成立，細哨隨時要返番入獄踎多五年，佢兩兄弟嘅代表律師就話要等成單案完晒先會發表公開聲明交代成件事。
另外，近日有南美傳媒報道指，細哨惹上官非後，EA已一直考慮將佢喺遊戲《FIFA20》內Ultimate team（UAT）嘅四張icon卡全部刪去。今次唔係EA第一次將球員喺遊戲中除名，之前荷蘭名宿尹巴士頓就因喺評述期間用上納粹用語，事後遭受各方批評，亦令尹巴士頓喺UAT嘅所有icon被刪除。細哨喺《FIFA20》嘅四張icon卡，其中包一張數值高達95嘅icon moment卡，從網上數據睇，呢張卡最新成交價高達1,075萬UAT coins，若最終細哨被除名的話，實在令買入細哨icon卡嘅機迷「蝕到入肉」。