武肺疫情廿四小時不停更新，各家自掃門前雪，連本地新聞都應接不暇，哪還有閒情打聽別人地頭狀況，所以法國強制隔離已經浩浩蕩蕩邁入第四周，仍然收到生疏遠方朋友垂詢「最近有冇出街食飯」，一點也不奇怪。國際名人確診雖然比較矚目，因為後浪推前浪頻密接踵登場，聚光燈照射的時間並不長，顯赫如湯漢斯杜明高查理斯王儲艾爾拔親王，亦不過每人分得十五分鐘，知名度不及他們的瑪莉安菲芙只有一小撮信眾關懷，主流報章隨手頒贈「老牌歌后」銜頭，挖出陳年拖友米積架做配菜，已經叫十分畀面。羅琳自爆疑似中招，哈里波特的光環根本唔夠份量，報屁股蹲一蹲消失無蹤──近排誰沒有幾聲輕微咳嗽兼夾略略發燒，默默坐在家裏當製造抗體算了，嚷出去分分鐘換來「賤人就是矯情」評語，簡直自取其辱。
英國首相那單倒是霸佔全球頭條，由提倡佛系到宣佈確診到入院檢查到進駐加護病房，峰迴路轉步步驚心，隔岸的法國時事評論員童言無忌，乾脆開壇研究萬一拉柴如何收拾殘局，絕對不嫌大吉利市。自己政府搞到立立亂，唔該唔好咁鬼八卦啦，不如討論尼斯剛剛推出的全民蒙面法是否可行仲好──外科口罩留畀前線醫護，普通人DIY布罩喎，你話係唔係攞嚟搞？巴黎則漏夜修訂禁足令，規限每天外出一小時照舊，但上午十點至下午七點不能跑步只可買餸買藥，希望藉此控制人流。與宵禁背道而馳的法例，靈感大概源自健身院，黃金時段會員費較貴。咦，運動員深夜紛紛出動，精力充沛賀爾蒙旺盛，不怕催生淫亂嗎？