商務及經濟發展局長邱騰華早前老屈港台節目《The Pulse》女記者，話該名女記者日前訪問世衞官員會否重新考慮接納台灣為會員，等同違反「一個中國」原則，揚言要港台台長梁家榮就此負責。
前日人民力量議員慢必陳志全就喺立法會特別財委會上質問邱騰華，香港鳳凰衛視女記者噚日喺白宮記者會否認自己為「中國」工作，而係為「香港」工作嘅言論，又係咪有違「一個中國」原則時，邱騰華只係顧左右而言他，拒絕畀出回應。
唔評論有冇違反一中
邱騰華無回應慢必相關提問，八方噚日再次查詢商經局，對於香港鳳凰衛視女記者噚日言論嘅睇法，商經局回覆時繼續拒評鳳凰衛視女記者嘅言論有冇違反一中原則，以及會否對鳳凰衛視追究或批評時，繼續唔正面回應，只係話早前已經發出新聞稿，清楚表明轄下嘅港台作為政府部門同公共廣播機構，必須恪守同按照《香港電台約章》履行職責，「我們沒有其他補充」。