現年38歲嘅梁嘉琪2007年由有線跳槽無綫後，拍劇做主持雙線發展，更係節目《學是學非》嘅大師姐，做足六輯。但近日有傳因為佢去年6月曾喺Ig貼出一張寫住「加油」字樣嘅相，留言：「轉右90度看。」即變成「香港」為港人打氣，結果被秋後算賬雪藏，不但早前被飛出最新一輯《學是學非》，據悉佢近日更已低調離開效力咗13年嘅無綫。
趁機增值
《蘋果》前日向梁嘉琪求證離巢一事，佢承認，但未有透露正式離巢日期：「唔好意思，合約真係唔方便透露，但非常感謝公司一直畀咗好多機會畀大家認識我，有新工作一定會話畀大家知。」佢話會趁機好好增值自己，𠵱家會擺多啲時間喺網上賣裙嘅生意。
愛上行山
梁嘉琪噚日喺Ig貼出一張着住自家tee嘅自拍照，再留言為自己打氣：「這半年愛上行山，只要努力、堅持，頭上一定有光帶領你，前面一定有美好風景等待你。」跟住仲hashtag「路一直都在」，雖然完全冇提到離巢一事，但唔少網民都留言叫佢加油。
其實去年11月已傳梁嘉琪被雪，但當時佢否認：「仲未約滿，大家仲可以見到我。」點知唔夠半年梁嘉琪真係離巢，早前喺J2台播出嘅《血併全世界》成為佢喺無綫嘅最後一個節目。梁嘉琪2003年喺演藝學院戲劇學院畢業，後來加入有線主持節目《怪談》。有指梁嘉琪係經王祖藍引薦下加入無綫，曾經同李佳芯、黃翠如被視為有線過檔嘅三小花之一。
撰文：馮仁昭