退役15年，要復出再戰國際賽場絕非易事，不過前香港游泳代表隊成員方力申（小方）卻以行動告訴大家：「夢想唔係後生仔專利。」
記者：許嘉明
攝影：廖雁雄
去年看到小方為慈善復出，破紀錄以10小時43分06秒完成45公里環香港島，成為首位完成45公里環島泳的港人，亦是第四位完成此項挑戰的泳手。當時一班行家打趣道「也許ABC君，這次也不及方力申。」怎料小方在今年三月突然在ig宣佈再戰國際賽事，打算參加國際泳聯（FINA）先進組世界游泳錦標賽。被問及此事，小方第一反應竟為：「其實冇諗過咁多人問，呢個唔係精英比賽，係我口中嘅耆英比賽。」雖說這是先進組的分齡賽事，但選手年滿25歲便可報名參加，剛踏入不惑之年的小方將參加40至44歲組。
小方在2000年悉尼奧運後加入娛樂圈並逐漸淡出泳壇，他坦承在去年環島泳前，近15年不曾游泳，也對游泳喪失興趣 ，「游水係個人運動，冇乜樂趣，唯獨係有好成績就會繼續游。所以我游完奧運入行加埋讀書，知道自己唔會再進步，你唔會想做一樣嘢一直差落去。」不過備戰環島泳起每周練水5至6次，令小方開始重拾水感之餘，也重燃游下去的動力：「環島泳最大得着，係發現夢想唔係後生仔專利。當我3、40歲有個夢想，去圍住自己屋企游一圈。我由一開頭好辛苦，400米都游唔完，到慢慢有番自信，最後得咗。自己開心之餘都感染到人，令人想Pick up番自己放低嘅興趣，所以就覺得興趣目標係冇年齡限制。」
自信40歲嚟講游得最好
為免因失去目標而永久放棄游泳，小方決定報名參加先進組世界游泳錦標賽，他更透露受到前香港羽毛球代表陳念慈的邀請，參加明年在關西舉行的世界先進運動會，同行的還有單車名宿洪松蔭。他笑言現時每星期至少練水三次，每次在早上5、6時開始，希望可以操起體能，加強爆發力去應付比賽。小方直指重出泳壇後喚醒自己的好勝心，「可能我喺演藝界唔係一線，但游水我係一線，我40歲嚟講都係游得最好。」
東京奧運因武漢肺炎延至21年舉行，FINA賽事或因而受到影響，但小方卻表示會以平常心應對一切：「其實參賽都只係一個目標，就算我今日話出年比賽，都可能因為做嘢練唔到水，或者結婚生仔練唔到水。冇人知道一個成年人一年內會有咩變改，只係畀自己一個目標去做。」提到奧運延期，小方指對現役運動員的影響極大，亦希望港將可把握機會爭取達標：「其實對香港嚟講，延長番達標時間，除咗歐鎧淳同何詩蓓之外，可能再有其他選手達標。不過咁都公平，全世界都延期一年。」
參與奧運是運動員的夢想，小方也不例外。小方曾於00年以運動員身份參加悉尼奧運，往後兩屆的雅典和北京奧運，他除了傳遞聖火外，也為電視台擔任評述員，他說：「奧運係超過10年嘅訓練換嚟嘅一個回憶。由細個嗰陣未必會知道自己有機會去奧運，但慢慢真係實現到嘅時候，就會覺得呢件事係好美好。」至今仍以作為土炮泳手而自豪的小方，期望後輩能青出於藍，「好似何詩蓓咁樣，土生土長嘅運動員都可以去到世界級，其實對香港泳手係一個好好嘅鼓勵。歐鎧淳又係啦，27歲仲游到個人最佳成績，仲可以喺主項（100背）達A標。」
兩港績塵封廿年
談及一班後起之秀，小方也笑稱自己太早退役，他也承認1998年曼谷亞運在男子4x200米自由泳接力得梗頸四後，曾計劃要在往後的亞運再衝一面獎牌。不過完成悉尼奧運後入娛樂圈，同時入讀香港大學經濟及工商管理系，當時作出權衡後，終選擇以學業及演藝事業為先，並將游水放在第三位，之後更慢慢淡出泳壇。
傳媒慣性為人起朵，在方力申眾多綽號之中，「飛魚王子」大概是最歷史悠久的一個，就連他在加入娛樂圈後的首部電影《2002》，也是出演「水鬼」一角。泳手變藝人看似噱頭十足，但小方卻透露自己入行初期，很介意別人提及其運動員的身份，「一開始我好介意人哋記得我係運動員，覺得咁樣唔專業，應該話我係演員或歌手。」不過隨年漸長，小方發現只有自己更加努力，才能獲得別人尊重：「大個就慢慢諗，我一係俾觀眾淘汰，一係自己爭氣，咁咪一路學一路做。其實最緊要係要有自知之明，所有嘢係自己爭返嚟，唔係人哋畀。」他直言運動員要轉行，可能比普通人來得困難，但「做好自己」卻是在各行各業都適用的方式：「我哋好難滿足所有人，最緊要係覺得自己有冇進步。就好似運動員，好多嘢唔係自己掌握到，要知道自己點樣可以做好啲。」自己在悉尼奧運寫下的男子200米背泳及男子400米個人混合四式兩項港績塵封廿年，小方直言始料未及，也慨嘆對香港泳壇發展並非好事。
18年跟拍檔創辦游泳學校Hong Kong Swimming Academy後，小方有感不少人皆短視及功利，為博升學及加入港隊，在年輕之時便會專項練習：「我以前要學晒咁多式，打好基礎，甚至可能一個比賽有10項就報足10項。但𠵱家好多人都唔會游400米個人混合四式。佢哋練習專項咗，比賽又少咗，但細細個點知將來邊樣嘢好啲？太細個定型，會抹殺好多潛能。」
最後悔奧運證交學生相
大家在一年多前以為小方的港績，會由杜敬謙打破，因此子在16年從澳洲回流，翌年取得代表香港比賽的資格後大放異彩，連番刷新長池及短池的港績，至今仍保持15項不同的紀錄。小方提起對方時表示：「佢一個可能幫到男子接力隊成團，我覺得佢有機會喺亞洲比賽有獎牌 可能話到畀人知細粒都出到成績。」惟天妒英才，他在去年三月美國訓練期間昏迷，送院搶救後不治，終年26歲。作為師兄的小方在社交網站發文悼念，並指對方為「巨人殺手」並以精神感染大家。
小方復出完成環島泳後，除了計劃重投賽場外，更希望以身作則成為好教練，培養游泳學校的一班小學員。他笑言：「希望班學生知道方教練有幾好，而唔係聽到爹哋媽咪話我以前游得有幾好。可能佢哋平時游一個鐘頭都嗌辛苦，但我可以連續游10個鐘，我教佢游水時說服力都大啲囉。」從參加悉尼奧運後逐漸淡出泳壇，到放下游泳15年後毅然復出，小方無悔一切決定。唯一令他懊惱的，大概是草率遞交學生照去製作奧運選手證。看着20年前的自己，小方不禁笑言：「以前求其交張學生相，早知我搵張靚啲嘅相，20年後先知係咁緊要嘅。」