抗疫慢半拍嘅777，噚日同問責班子拍咗條拍手片，向俾佢指摘過激進嘅醫護致敬，示範畀公眾睇乜叫口不對心。
如果掌聲可以抗疫，武漢肺炎早就絕迹。777班子唔知係咪怕招來話柄，短片中每個組合最多四人同場，齊齊戴口罩上陣，但17個人中，竟然戴緊最少四款唔同口罩，三司中陳茂波就用疑似CSI綠色口罩，777同張建宗、鄭若驊就戴深淺不同嘅藍色罩！
八方數埋其他人，發現只有羅致光同李家超用疑似CSI版，劉江華、邱騰華、黃錦星等五個局長用白色；另外喺今次抗疫唔覺有任何貢獻嘅創科局長楊偉雄，寧寧舍舍戴住個唔同款口罩，成班人毫無隊形。問責班子唔使用，醫護又唔見收到，公務員就呻唔夠，而PoPo就對被捕人士派紙口罩，咁究竟啲CSI口罩去晒邊？