唯一教齊晒皇家馬德里、巴塞隆拿同馬德里體育會三大西甲班霸嘅塞爾維亞名帥安迪喺周一過身，享年71歲。據西班牙《馬卡報》報道，安迪患重病已經一段日子，而塞爾維亞足總就喺官網向安迪致敬，又指塞爾維亞會為呢位名帥而感到自豪。安迪球員時代踢後衞，退休後喺1991年3月至92年1月教過皇馬，之後又曾經三度執教馬體會，02/03球季就接替被炒嘅雲高爾做巴塞隆拿教練。安迪之後教過塞爾維亞國家隊，仲去過中國教中超嘅河北華夏幸福。一代名帥離世，皇馬、巴塞同馬體會都有向安迪致哀，馬體會喺twitter發文︰「馬體會大家庭哀悼我哋其中一位傳奇教練安迪，你永遠活喺我哋心中，安息！」