英超球會熱刺周一證實，球隊南韓前鋒孫興民會喺球季因武漢肺炎暫停期間返南韓服兵役，完成訓練後會喺五月返番倫敦。所有南韓男人都要喺28歲前服兵役，雖然今年7月就28歲嘅孫興民喺2018年幫南韓贏咗亞運男足金牌，可以豁免21個月兵役，但都係要參與四個禮拜嘅軍訓。孫興民2月喺熱刺贏阿士東維拉3:2嗰場波度手臂骨折，喺南韓做完手術就返咗英國養傷，上月再獲准返南韓。熱刺周一喺聲明度表示，三月底返南韓嘅孫興民𠵱家自我隔離緊，同埋將會喺南韓服埋兵役。熱刺領隊摩連奴就話過，冇預過孫興民今季仲踢到，不過就係喺英超上月因疫情停擺前講嘅，家陣英超無限期暫停，對熱刺影響都冇乜嘅。