疫情期間喺屋企冇嘢做，突然有「需要」想刺激吓官感睇成人動作片，本來唔係咩大件事，好似之前諾域治中堅添姆高路斯，都試過俾網友喺佢ig相中踢爆佢睇Pornhub，最多咪笑吓算。不過，當呢件事發生喺最近先開完性愛派對嘅曼城右閘基爾獲加身上，就令人覺得呢位英球壇新Play boy真係鹹到出汁。
約其他三獅兵上網睇直播
一波未平一波又起，獲加啱啱上周先俾英國《太陽報》踢爆佢喺隔離令期間搵援交妹上自己另一私人公寓，加埋一位朋友同兩女大開4P淫賤派對，形象受損後要公開道歉。已經多次違反社交隔離令嘅佢，雖然終於肯留番喺屋企，但可惜本性難移，事隔只係兩日又俾《太陽報》捉到佢喺網上睇脫衣舞騷，而且今次仲牽連甚廣，連埋英格蘭隊友拉舒福特、查頓辛祖同史達寧，都被踢爆有份同佢一齊上網睇，據講仲有嚟自愛華頓同修咸頓呢兩間球會嘅球員，但就冇開名。
呢場脫衣舞直播，由饒舌歌手Lanez做主持，喺影片中係咁叫一名叫Zia嘅脫衣舞女郎，除晒身上衣物，而且開場白嗰陣仲話：「好多球星都聚咗喺呢度！為咗佢哋，你都快啲撕開你件衫吧！」
Zia一邊跳住舞搖擺自己身體，一邊對住鏡頭晒出佢嘅胸部同臀部，仲向鏡頭前嘅球星揮手。睇得興起嘅獲加，即刻留低一個「喊住笑」嘅emoji回應，當見到獲加呢位歡場大佬留言，其他好似史達寧、福仔同辛祖等先放膽留埋一份。有消息人士就對報章話，呢班球星咁樣做，好容易激嬲班領隊：「我唔認為英格蘭領隊修夫基或其他球會領隊，會鍾意班球員參與呢啲色情表演騷，但最起碼基爾獲加今次係留喺屋企冇違禁……」
同朗尼一家吹水俾警察趕
冇違禁？今次冇囉，但佢上周五其實已經違反多次隔離令，去探訪前女友Annie Kilner期間，帶埋三個仔女一齊去散步，途中竟遇到鄰居朗尼一家，大家停低傾偈，差唔多成10個人聚集一齊，已經違反咗政府指引，冇保持適當距離，有女警接報後即刻到現場驅趕佢哋，睇嚟佢最近真係乜都唔好做，日日冚被瞓覺算。
獲加基本上都已經名譽掃地，老實講正常人如果係佢，呢排俾班傳媒睇到咁實就乖少少喇，咁樣落去，睇嚟連其他隊友都真係怕埋你，黐埋去邊個都死！