武漢肺炎下，不少地方的首長都帶頭減薪或凍薪，唯獨民望極低的港府特首林鄭月娥，竟然反其道加12萬年薪，達521萬，令全城譁然，藝人及名人紛紛口誅筆伐。對於林鄭在抗疫下仍加薪，袁彌明昨日回覆《蘋果》，她力斥：「違反常理，市民飯碗不保，佢就加薪，全世界最自私嘅長官第一名。論經濟，所有領袖都凍薪或減薪，論表現，去年反送中搞到香港咁，今年初又唔一早封關，憑甚麼加薪。」
秋生冇眼睇
黃夏蕙昨日接受《蘋果》電話訪問，她促林鄭停薪積福，捐糧救港：「好離譜，佢咁高人工，日日可以食鮑魚，基層就冇飯開。如果我做特首，呢個時間應該帶頭唔要人工，以身作則，直至疫情穩定為止先攞返。禮賓府大把嘢食，佢唔收人工都係幾個月，唔會餓死，𠵱家死嘅係我哋呢班巿民。好心佢體察吓民情，當幫屋企人積福都好喇，我冇特首咁多錢，但做人唔好咁囉，乞兒冇錢買口罩都乞唔到食，大家真係好慘。」黃夏蕙近日多次出錢出力，派口罩和物資給基層。
黃秋生接受訪問時一針見血：「冇眼睇。」杜汶澤也揶揄林鄭臉皮極厚：「通常一個僱員表現好先至會加薪，林鄭過去一年不停殘害香港人，咁睇嚟中國政府表示好高興。」
陶傑嘲貪婪
才子陶傑前日也在fb鬧爆林鄭：「百業萎頓，全港老闆加打工仔坐困衰退，獨林鄭月娥把握機遇，趁亂向庫房伸手扒撥，在呼籲香港商場業主減租之後，為自己加薪12萬，引起全港公憤。連新加坡總理內閣也帶頭減薪一個月，林鄭逆向自我加薪，此一被指為『替你的智商着急』之前殖民地土著班子，亦可謂不失時機地武肺期間向全球呈獻之又一中國式笑話。」
陶傑又寸爆林鄭民望僅得9%，隨時被中國勒令下台，又嘲：「Lam Cheng（林鄭）帶頭示範如何『Lam』淨每一個崩之『考第一』貪婪食相。」
採訪︰陳杰