早排滙豐控股應英倫銀行要求，取消派發2019年第四季度股息，仲預告埋2020年全年將不派息、不回購，自然引起小股東不滿，要向獅子銀行追究責任，但唔知點解全國政協副主席、前特首梁振英忽然叉隻腳埋去，除咗煽動港人杯葛滙豐、有錢唔好買滙豐外，仲連滙控董事局兩個港人非執董，港交所主席查史美倫、希慎主席利蘊蓮都擺上枱，叫佢哋要立即辭職，連愛國愛港人士都打埋。
話要官民合辦「香港銀行」
其實之前好多網民不滿獅子銀行親北京，搞到幾間分行俾人「裝修」，但689𠵱家反過嚟話獅子銀行親英，實際聽命於英國政府，又鬧部份英國人當香港人冇到。佢認為買起滙豐、要滙豐遷冊香港都唔可行，提出由香港官民合辦一間以香港為總部嘅國際級銀行，仲連名都改埋，叫香港銀行（The Hong Kong Bank），呢位政治閒人又話以往不斷有人建議香港要搞個類似主權基金嘅政府投資機構，而「香港銀行」正正啱用！
不過插還插，689插獅子銀行之餘，唔使叫查史美倫同利蘊蓮辭非執董，有政圈好事之徒話，689講到獅子銀行幫晒英國人，咁佢兩個唔辭職，咪即係企英國人嗰邊，唔企香港人呢邊？689為乜咁擺人上枱？特別係查史美倫做過中國證監會副主席，做得呢啲位一定係愛國愛港中堅分子，689咁玩佢唔知北京又知唔知？
政圈好事之徒仲話，689對搞主權基金一類金融機構情有獨鍾，當年佢搞金融發展局，就係想變主權基金，好彩當年做財爺嘅薯片叔叔企硬反對先唔成事，保住香港財政儲備冇俾人亂使，但689又死心不息，又想借呢單嘢再搞主權基金，背後有乜目的，恐怕唔使畫出腸。
李八方