被爆出喺武漢肺炎疫情期間喺屋企開性愛派對嘅基爾獲加（圖），事後雖已道歉，但曼城已表明將會進行內部調查，獲加面臨紀律處分。
《太陽報》上周六報道，上周三英國公開呼籲公眾遵循政府指引，留喺屋企保持社交距離嘅英格蘭後衞基爾獲加，上周二曾經同一個朋友召嚟兩個應召女郎，喺屋企開性愛派對。事件被揭發後，獲加發表咗聲明道歉，不過，曼城亦表示會進行調查。
曼城喺聲明中話︰「留意到小報上有關基爾獲加喺英國封城期間，私生活違反保持社交距離規則嘅報道。足球員係全球嘅榜樣，我哋嘅職員同球員一直以任何我們可以嘅方式，全力支持英國國民保健（NHS）同其他對抗新冠肺炎工作者嘅努力，獲加喺呢件事上嘅行為直接違背咗呢啲努力。」
曼城表示︰「我哋對聽到呢個指控感到失望，亦注意到基爾獲加迅速嘅聲明同道歉，並將喺未來幾日作出內部紀律程序。」英國《每日郵報》則指，基爾獲加將面臨曼城會方巨額罰款處分。