林鄭政府搞網上公關戰嘅成效，大家有目共睹，八方之前寫過可以畀人留言狂鬧都當「成果」吹捧，民主派莫乃光噚日喺立法會特別財委會關注特首辦由2017年至今，為聘請負責管理林鄭facebook同Instagram嘅小編，至今已用咗公帑142萬，但過去三年合共發帖只有687個，「計起上嚟，即係每一個帖文要2,066元，我唔知審計署有冇權睇吓衡工量值，呢個應係全香港最貴嘅小編」。
謝偉銓都質疑成效
莫乃光又話從特首喺相關帖文前後嘅民調評分可見小編嘅表現，但話自己唔想怪責佢，「因為佢要賣嘅產品實在太難賣，冇人會買」。
建制派謝偉銓亦質疑呢位小編嘅工作成效，特首辦常秘林雪麗則指政府除咗特首facebook同Instagram，亦另立「添馬台」專頁發佈訊息，謝偉銓此時就問：「想知添馬台幾時有？」林聞言表現尷尬話：「已經成立咗好耐，應該係3月份（成立），er……（去年）12月份。」