娛樂圈真係一面照妖鏡，人性嘅醜陋表露無遺，好似屋邨出身嘅「街市佬」，只係拍過幾部戲，喺呢行冇乜成就，但就畀佢有機會黐埋巨星同有錢佬身邊，最後仲畀佢擦鞋擦出一片天，開公司做老闆，不過佢份人忘恩負義，搞到眾叛親離。
話說街市佬雖然讀書唔多，不過識人好過識字，趁有機會埋巨星同有錢佬身都投其所好，好快令到大家當佢係兄弟，當知道街市佬想過老闆癮，有位朋友就仆心仆命幫佢實現夢想，介紹有關係嘅人物畀佢識，仲吩咐自己公司嘅得力助手幫拖，全力協助街市佬開公司；點知，街市佬竟然唔熟唔食，出高價撬走好友嘅得力助手，之後仲一句都冇同好友交代過。
朋友割席
呢件事被圍內朋友知道後，都不值街市佬所為，眾朋友之後喺社交場合見到街市佬時，大家當佢冇到，招呼都唔會同佢打，而街市佬雖然面皮幾呎厚，但都知衰字點寫，之後就自動玩消失，唔敢再喺同一圈子出現，𠵱家佢就轉戰去外地發展，幾乎喺香港人間蒸發，識過另一班有錢朋友，繼續佢嘅擦鞋之路。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
