早前基斯坦奴朗拿度（C朗、右）決定扣薪四個月，收少1,000萬歐元（約8,630萬港元），同隊友齊齊與祖雲達斯共度時艱。不過佢似乎唔太在意踢波份糧，事關呢位葡萄牙前鋒吸金力十足，舊年透過自拍廣告、運動贊助、肖像費同個人品牌CR7等已賺到3,600萬鎊收入，福布斯預期C朗可成為第1位收入破10億美元（約78億港元）嘅足球員，係現役運動員中收入僅次拳王美韋達同高爾夫球名將活士。最近喺屋企抗疫嘅C朗仲畀女友佐真娜（左）操刀剪頭髮，仲豎起拇指讚女友手勢好。不過一位外國男孩就無咁好彩，喺屋企叫爸爸照住C朗個頭嚟剪，點知爸爸整蠱佢，幫佢剪咗個「大哨」朗拿度嘅河童頭，真係陰公。