武漢肺炎疫情下，見到好多球星講一套做一套，一方面出嚟講防疫嘅重要性，呼籲大家最好冇乜事就乖乖留喺屋企，但另一方面就繼續出去玩。大約兩個禮拜前，曼城後衞基爾獲加就已經畀英國《太陽報》捉到，同隊友馬列斯仲有佢熱刺舊隊友迪利阿里等一班人去飲酒狂歡，家陣英國政府有令要閂晒所有酒吧同夜店，呢位曼城右閘就索性將自己嘅消遣場所搬到私竇，喺一個月租8,000鎊（約7.6萬港元）嘅公寓中同友人大搞4P性愛派對，仲有相為證，證據確鑿冇得唔認。
被耻笑係偽君子
獲加連續兩次畀《太陽報》踢爆，今次呢單性愛派對據悉係上周嘅事，最諷刺係佢後一日仲喺ig拍片同人講防疫幾咁重要，但自己前一晚先開完淫P。其實呢單嘢就係同佢開完淫P嘅援交女爆出嚟，呢位叫Louise嘅21歲援交女，仲係一位喺曼徹斯特城市大學讀犯罪心理學嘅學生，佢指當晚收到負責呢啲援交交易嘅中介公司電話，話個客想要一啲比較有學識同高貴少少嘅對象，後嚟就上咗對方安排嘅車，而車上仲有另一位24歲嘅巴西籍女仔，兩個人嚟到喺柴郡嘅一家豪華公寓，就有一位男士出嚟接佢哋，就係今次一齊開淫P嘅獲加老友。
Louise話自己其實見到獲加時都唔知佢係球員，係另一個女仔講先知，仲話叫佢望真啲佢條底褲有「Kai」呢個名，就係基爾獲加出嚟玩嘅代號。然後兩個人就向佢哋支付2,200鎊（約2.1萬港元）現金作為今次派對報酬，而獲加仲開咗盒金色嘅安全套，四個人喺間屋大戰到凌晨兩點，兩位囡囡先至離開。
哥帥嬲爆必重罰
唔知獲加知唔知，Louise影埋佢相，所以向《太陽報》爆料嗰陣可以show埋，真係唔到你唔認。Louise仲笑獲加根本係偽君子：「我睇到佢第二日喺社交網叫大家要安全居家隔離，即刻心諗呢啲就係偽君子，啱啱前一晚先做完高風險嘅嘢。」呢單醜聞爆出後，獲加已即刻發聲明道歉，話自己冇做到榜樣，但據聞曼城同領隊哥迪奧拿好嬲，唔排除會重罰呢位右閘。
其實獲加真係風流史一大堆，早前同幫佢生咗三個細路嘅女友分手後，畀第三者嘅真人騷模特兒Lauryn Goodman爆佢出軌，仲搞大咗佢個肚，睇嚟英球壇最新嘅玩家非佢莫屬。