【娛樂人物】「香蕉仔」鄧一君去年先後在油麻地及尖沙嘴開食肆，決心在飲食業界大展拳腳。怎料卻先後遇上逆權運動及武漢肺炎，生意大受打擊，由盈轉虧，去年油麻地舖率先「陣亡」，尖沙嘴舖日前也撐不住終告執笠。鄧一君年半內勁蝕200萬，但他並無怨言，更不忘叮囑大家現時不要出街聚餐，齊齊出力抗疫。
撰文：勞燕萍
攝影：沈健程
香港在去年6月爆發社會活動，港人還未停定喘息，緊接今年1月內地爆發武漢肺炎，肆虐全球，各國各地經濟陷入谷底。轉營做投資分析顧問的鄧一君去年投資50萬在油麻地開設「立食」車仔麵店，未夠三個月，他再加碼150萬在尖沙嘴以月租13萬，再開一間有40個座位的食店。可惜短短年半間，食店生意由盈轉虧，去年7月油麻地舖率先結業，鄧一君日前受訪時，只剩下尖沙嘴舖，他當日表示：「1月開始生意暴跌，少咗七成，近呢一、兩個月，每月都要倒貼十幾萬，如果再差落去，我哋唔排除會斬纜。」鄧一君所言非虛，尖沙嘴舖在上周四無奈結束，成為藝人疫市下的「第一滴血」。
賺到人情味
兩間舖頭先後執笠，短短年半蝕足200萬，旁人也感肉赤，但鄧一君卻未太放在心上：「有時做生意唔一定講錢，因為你賺到啲經驗可能幫到你之後做嘢，咪當交學費。」除了經驗，鄧一君也賺到難能可貴的人情味：「呢年幾最開心都係同啲客相處嘅時間，只要個客入嚟食我哋嘅出品，讚我哋啲嘢好食，我就好有滿足感，有人食完臨走同我講句：『一君加油呀！』咁就夠。」
第一次做生意，最終執笠蝕錢收場，鄧一君想法依然樂觀，有信心有日「東山再起」，他表示：「雖然疫情令我間舖執笠，但我依然覺得市民應該要留喺屋企，盡量唔好出街，大家唔出街、唔聚餐，盡快等過咗個疫情先。咁我呢度做唔掂，遲啲等疫情過咗咪再搵個間做囉，我團火仲未熄㗎！」
童星出身的鄧一君，成名作是1993年的《記得……香蕉成熟時》，「香蕉仔」一名講足多年，之後他輾轉到無綫，結果認識好友古天樂（古仔），去年古仔百忙中到油麻地的食店幫襯兼留影，兩兄弟重聚勾起不少人回憶，鄧一君說：「我同古仔係1997年拍《美味天王》時識，之後拍《烈火雄心》，仲有《尋秦記》，雖然我冇做呢行，但呢二十幾年大家keep住聯絡。」
為古仔復出
古仔出名重情義，對識於微時的鄧一君份外上心：「古仔未嚟過尖沙嘴舖，不過試過幾次佢喺附近拍戲，叫助手打電話嚟買外賣，每次叫都係幾百份雞翼、魚蛋、燒賣同飲品。」提到這位老友為人，鄧一君認真地說：「係人都知佢仗義相助，鍾意幫人，佢做好多慈善嘢，不過好低調咁做。佢呢樣嘢都影響到好多身邊朋友，好似我咁，我以前唔係成日做慈善嘢，冇呢個習慣，自從見到佢成日做之後，都改變到我心態『咦！係喎，你又唔係搵唔到錢，又唔係話冇能力幫人，好似老闆（古仔）咁幫吓人都得㗎！』」
去年古仔宣佈將以原班人馬拍電影版《尋秦記》，原來鄧一君也有份到內地客串幾日戲：「我多謝佢至真，畀我過吓戲癮，初時我以為會好快上手，點知一拍返，原來真係會生疏會緊張，會覺得啲對白難記咗，有啲吃力。」鄧一君雖是客串，但有幾場主線戲都落在他和古仔身上，他坦言有不少壓力。曾經講過對幕前沒有留戀的鄧一君，若古仔再找他拍戲會否應承時，他爽快地說：「佢開到聲實幫。」