藝人做生意，有窩心也有激心，鄧一君也不例外，他坦言最棘手的是人事問題：「估唔到舖頭數埋得幾個人，點知有咁多是非同衝突。聖誕、農曆新年時，有員工問我：『老細，紅日嗰幾日會點安排呀？』初時我唔明，後來諗佢係想知有冇假放或者特別津貼。咁我問啲做飲食嘅朋友，佢哋話梗係兩樣都冇，點知就有一個半個同事周圍話我刻薄，我就覺得點解唔喺開會時表達想法，大家有商有量，你咁樣係幫唔到件事。」
員工反咬要投訴
另一件令鄧一君更失望的事，發生在約一個月前：「有個員工喺呢間舖頭做咗個幾月，佢最初好肯做好快上手，我都好錫佢。點知有一日佢突然不辭而別，咁佢冇交低落，我哋經理咪搵佢簽返份文件、交收制服同鎖匙，按規矩佢要賠返七日代通知金畀公司，但佢唔賠之餘，仲反咬話係我哋炒佢，話要去勞工處同《蘋果》投訴，語帶威嚇好似話睇吓我嘅名氣定件事緊要。」鄧一君由這些事深深體會，公眾人物搞生意隨時會遇上更多問題。