3月28日本欄寫「經濟無望，買股不宜」，老友記廠商來短訊云：「丁山兄，最近幾天美國公司大幅度削訂單，前所未見，他們要保住自己，撤單語氣非常堅決，一切後果由廠家負責，很多廠正面對巨大困難！」又云：「很多廠銷售下跌五成算大幸運，不少訂單大幅下滑，資金斷鏈，剛剛復工，即要馬上踩逼力（Brake），你的文章看法很接近事實。」
並非胡亂吹水，自然接近事實。廠家之前僕僕風塵，到歐美搵訂單，好彩在英美肺炎疫情大爆發之前回到香港，唔駛隔離14天，但接到單不久，又因疫情每日變化太大，英美急令social Distancing，人民不出門，不駕車到商場購物，於是美國進口商及大零售商急急打倒昨日之我，話咁快就火速撤銷訂單，令本港廠商硬咗軚。兩個星期前本地廠家為咗要監督大灣區工廠復工，要求特區政府豁免佢地回港後隔離14天之規定，特區政府話考慮吓，點知未有決定之前，廣東已下令香港人過羅湖橋要接受隔離14天，以減少病毒倒灌可能性，此令一下，香港廠商全部禁足大灣區，我地真係想像唔到，大灣區之港商工廠，冇香港老闆及高管人員監工，如何可以正常復工？但即使復工，訂單就飛走咗，馬上要停工！
習近平心急復工，親自到富裕大省浙江觀察復工。習總非常清楚，就係各省市必須「抓復工，穩經濟，堅決保5」（GDP增長率冇講，保5%都要啩）。但係中共中央管唔到嘅就係，歐美咁鬼冇用，疫情不斷擴大，令歐美經濟停擺，消費需求急降，嚴重打擊中國復工熱情。試看3月29日大公報經濟版A12之大標題：「中國外貿企業陷生死危局」，副題係：「疫情蔓延訂單取消，影響恐越金融海嘯」，內文係講溫州一間大型鞋廠，在2月底為大量積壓訂單而緊急復工，3月20日之後，撤單暴增，至3月26日已有80%的訂單取消，理由與疫情有關，幾間溫州大廠剛復工不久，已宣佈4月開始放無薪假至月底。外商撤單如此急勁，習近平打多幾次電話畀特朗普都冇符，難怪中國專家穆真在信報專欄（3月30日）講：「戰疫進下半場，先救外貿出口」，中央政治局已把工作焦點，由抗疫轉至刺激經濟，救經濟。環球經濟體系一環扣一環，馬來西亞鎖國，即時令到安全套及醫療用手套供應短缺，依家輪到美國不止發燒，而係疑似確診，環球經濟有排唔掂。