現年40歲的商台DJ蘇耀宗(細So)昨日突然收到「大信封」被解僱,跟商台結束20年的賓主關係,商台聲稱因目前經濟狀況差要資源重組,不過有指細So「死因」是因曾頂撞CEO陳靜嫻。對於忽然被炒,細So失望地說:「覺得冇人情味。」細So昨晚原定照開咪主持節目,但節目最後也被抽起。
武漢肺炎肆虐,娛樂圈幾乎全面停頓,商台2月開始已安排員工放「無薪假」,但昨日終亦要向員工開刀。效力商台20年的DJ蘇耀宗,昨日突收通知被解僱,他接受《蘋果》電話訪問直認被炒:「公司理由話經濟差要cut人,今日收到信,有遣散費,計埋part time喺商台做咗20年,我就覺得冇人情味,但冇話傷心,只係失望,冇得每日做節目。」
與高層發生爭拗
有指細So曾頂撞上司,他坦言的確跟公司工作安排有爭拗:「最近因為疫情關係,大家要共用一支咪,我同公司有啲意見。疫情發生後,公司畀大家兩星期work from home,上月開始要再返公司,𠵱家有啲人可以繼續喺屋企做嘢,但唔係全部同事。我覺得冇理由將公司利益凌駕喺員工安全之上。」據知該上司正是商台行政總裁陳靜嫻。除工作安排外,細So也對「無薪假」安排有微言:「因為no pay leave,返6日工,其中一日冇pay,但冇leave,繼續要準備節目出街。」
《蘋果》昨午到貝澳找細So,他受訪時心情平靜:「其實收到消息,第一時間係擔心屋企人會擔心我,無奈𠵱家全世界都話要共度時艱,我就要同屋企人共度時艱囉。」對於被炒有指因得罪高層,細So表示不敢說是否因這個原因,但承認確實和高層在防疫問題上有過拗撬:「我哋做前線嘅共用幾個錄音室同幾支咪,之前都睇過一啲新聞係關於密閉空間,甚至用同一支咪就發生互相交叉感染,呢個係我哋擔心。」
森美慰問想幫手
細So最感安慰是同事紛紛送上慰問,他特別提到森美:「森美有問可以點幫我,其實都冇乜得幫,邊有彎轉?今朝CEO同秘書打畀我,話同我終止合作,之後已經有人送信同支票過嚟我屋企要我簽。我問佢哋幾時返去執嘢,佢哋話冇所謂,但聽朝我有個節目,佢哋話搵人代我,至於今晚嘅《生活日常》就未知點安排,可能喺屋企做。」結果昨晚細So的《生》節目臨時被抽起,改由梁文禮主持的《叱咤樂壇》頂上,連最後跟聽眾講再見都無機會。
細So老婆陳穎楠(Wing)昨午也在Ig為老公抱不平:「半世人只係打過一份工,捱生捱死20年,到最後一句再見都唔畀講,真係咁驚?」接着還貼出大堆餸菜的相片,並留言:「有人提我今日要食好啲。」商台對外事務部昨日回覆確認與細So終止僱員合約,指因應現時經濟狀況要資源重組。不少有網民表示不捨細So及留言鼓勵,甚至有人建議他另起爐灶,亦有網民提議ViuTV邀請細So加入音樂節目《Chill Club》。
採訪、攝影:皓騫、張名、徐錦池