俄羅斯足總周三宣佈，因武漢肺炎疫情嘅影響，足球比賽會延長停擺期到5月31日。基於俄超再拖延復賽，令足智彩嘅暫定受注球賽頁面家陣變成空白一片（圖）。俄足總經過最近一次開會探討後周三發聲明，話原本4月10日重開嘅足球比賽會延期至5月31日，賽會就表示會跟足總指引。原本足智彩喺「暫定受注球賽」一頁，4月10日仲有列出俄超波，但家陣俄超再延，所以繼續冇波賭喇。俄超再延遲，但賽會會長柏耶甸就話，佢哋現階段唔會考慮取消聯賽或將冠軍作廢，係會好似其他聯賽咁，繼續同球會開會聯繫。不過，莫斯科斯巴達就率先行動，話球員同意減薪40%。