巴塞隆拿球王美斯早前已經多次出聲，話希望尼馬可以返巴塞同佢拍住上再贏歐聯，巴塞最新就希望以今季表現唔似預期嘅法國翼鋒基沙文，加錢向巴黎聖日耳門（PSG）換尼馬返魯營。據知，PSG為尼馬標價為1.5億歐元（約12億港元），而巴塞就為基沙文標價1億歐元（約8.4億港元），巴塞希望以基沙文作為交易嘅一部份，等佢哋只需畀5,000萬歐元就可以將尼馬帶返西班牙。上季仲踢緊馬德里體育會嘅基沙文今季先加盟巴塞，可惜遲遲未能融入球隊體系，有指即使PSG唔願意接受基沙文加錢嘅轉會交易，巴塞都決定喺轉會窗重開時賣走佢，不過到時使唔使蝕水？你懂的。