喺武肺疫情之下，唔少歐洲球會都收入大減嗌晒救命，不過英超嘅曼聯因為之前做定準備，有本錢捱過呢個球壇寒冬，球會仲可以確保收到1.73億鎊（約17億港元）嘅贊助費，呢次全靠成日俾球迷鬧到飛起嘅副主席活華特咋！
魔迷表示呼吸都係錯
曼聯執行副主席活華特上任咁多年以嚟，都係唔少魔迷嘅眼中釘，一時又話佢簽啲球員同領隊返嚟冇用、一時又話佢亂搵贊助商，包括一啲嚟自亞洲嘅贊助商，例如同日本品牌杯麵合作就有人覺得唔夠貴格、又或者同啲聲譽唔係幾好嘅企業簽約，總之就做乜都唔啱咁。不過喺疫情下，熱刺、紐卡素同諾域治等英超隊都因為財困，而要向非球員員工開刀，曼聯反而就靠一筆可觀嘅贊助費照常營運同出糧，活華特可以話係曼聯嘅救世主。
根據紅魔最新一份年度財政報告，球會目前擁有61個商業合作伙伴，收入增長達11.9%，曼聯嘅商業總收入錄得2.75億鎊，超越咗佢哋喺轉播費獲得嘅2.41億鎊同比賽日嘅1.11億鎊收入，而贊助費就已經佔咗商業總收入當中嘅1.73億鎊。據外界推算今年曼聯雖然經歷武肺嘅衝擊，不過贊助費嘅收入仍然可以維持同上年相若嘅水平。國際會計公司德勤指，雖然曼聯近年嘅成績唔夠曼城同利物浦好，不過紅魔嘅商業收入仍然比呢兩間球會多出5,000萬鎊同9,400萬鎊。
韋斯咸黑腳贊助又摺
有業內人士就向英國傳媒透露，其實曼聯嘅營商方式同好多大球會都一樣：「曼聯過去簽贊助商經常受到批評，不過所有大球會都係以呢種方式增加收入，尋找商業合作伙伴可以令球會收入更加穩定同持續。以曼聯嘅營運模式同實力嚟講，佢哋會比其他球會更有韌力。」唔知一眾魔迷睇完之後會唔會對活華特呢位「救命恩人」改觀呢？
曼聯可以安然度過球壇寒冬，不過就唔係每支英超球會都咁好彩喇，另一支英超球會韋斯咸最近就損失咗一個贊助。佢哋嘅球衣袖口贊助商Basset and Gold係倫敦一間金融公司，不過呢間公司近日就宣佈清盤，佢哋對韋斯咸嘅贊助亦都要腰斬。今次已經係近12年嚟第3間韋斯咸嘅贊助商執笠，睇嚟槌仔幫腳頭認真麻麻喎！
