好多人都百思不得其解，點解曾經被譽為「好打得」嘅特首林鄭月娥，一時風光後會淪落到成為迄今最低民望嘅特首？或者睇吓特首辦答財委會質詢有關公關策略嗰部份，連吸引人去鬧777都可以吹捧，就唔難睇到777搞成咁嘅端倪。
360萬互動包括鬧爆留言
首先要鳴謝返負責提問嘅議會陣線毛孟靜先。據特首辦所講，政府仲搵緊合適嘅人做新聞統籌專員，換言之即係冇啦；其次特首辦並冇請外面嘅公關公司，不過佢哋有位合約工負責林鄭嘅fb、IG等，呢位合約工由2017年7.1至上個財政年度，一共出咗142萬蚊人工，今個年度就會出53萬蚊人工，除翻開成四萬幾蚊一個月，真係一啲都唔平。
Miss Mo亦叫特首辦講吓林鄭整咗社交媒體有咩成績。特首辦好似執到寶咁話，林鄭個fb專頁由2017年7.1推出至今「已吸引超過17萬用戶」追蹤，至上個財政年度出咗382個post，互動總數超數360萬等等。不過如果有去777個fb睇吓，就知係度留言嘅大部份都係鬧777，但特首辦就覺得係「吸引」咗超過幾百萬人互動，如果吸引人鬧都可以當係「成功」，咁八方冇嘢好講，亦明白777為乜日日俾咁多人鬧，佢可以冇事咁，因為佢可能當自己人氣高呢！
李八方