哥哥張國榮喺2003年4月1日沙士期間自殺，噚日係佢離開大家第17年，每年呢一日都有來自五湖四海嘅忠實歌迷風雨不改前往悼念，可惜今年受武漢肺炎影響，張國榮香港歌迷會早已表示取消一切悼念活動。
貼撐雨傘合照
歌迷多年來愛屋及烏，關心哥哥嘅一生摯愛唐鶴德（唐唐），不時喺佢嘅Ig留言慰問。唐唐噚日喺Ig貼出同哥哥嘅舊照，三言兩語表達出思念之情：「17年前你離開了我們，但我知道你在另一個國度裏時刻都想念着我們，特別在這嚴峻的時候會更加給我們鼓勵、打氣，希望大家一起加油，努力共同度過這一次的疫情。」相中見唐唐撐起雨傘，另一隻手搭着哥哥嘅膊頭，為身邊嘅哥哥擋雨，二人流露出幸福笑容。除咗唐唐，周慧敏特地為哥哥整咗一條影片，古巨基亦貼出哥哥嘅照片，留言：「我想知道你好嗎？」羅家英亦留言：「每年的今日，我們一起懷念哥哥，天堂上好嗎？」
各地歌迷獻花
有來自本地、內地同日本嘅歌迷噚日一早到沙田寶福山向哥哥靈位拜祭致意。有哥哥嘅後援會發起到尖沙嘴星光大道獻花，因應疫情嚴重，後援會喺facebook公告提議歌迷要避免多於四人聚集，工作人員會定期清理同消毒地方，並呼籲獻花者要戴上口罩。
以往哥哥死忌，佢墮樓位置嘅中環文華東方酒店旁雪廠街都會變成花海，噚日路旁只得數十束鮮花，只有近20名戴上口罩、無懼疫情嘅歌迷默默企喺路旁緬懷哥哥。踏入哥哥離開大家一刻嘅傍晚6時43分，以往歌迷舉行默哀悼念儀式嘅康樂花園，未見有任何歌迷出現。
撰文：馮仁昭