現年55歲的張達明，九年前患上鼻咽癌，為免拖累太太及一對子女，2016年選擇離婚，一個人生活。經歷多年與病魔搏鬥，抗癌成功，但後遺症是手腳24小時麻痹，他曾形容感覺就如戴厚手套和着厚靴，按不到掣、打不到機。最近，達明雙腳肌肉開始萎縮，每日落床成最大挑戰，快則幾秒，慢則要幾分鐘，但他看得化：「佛話人有三千世」，所以一世太簡單，要輕鬆面對。
撰文︰何永寧
攝影︰陳俊強
今年1月張達明由成都返港受病毒感染，發燒至39度；雖然禍不單行，但他卻樂觀面對：「OK，一般人面對疫情，正常生活。」早前大病初癒，達明接受《蘋果》專訪時，他表示要經常喝水滋潤喉嚨：「喉嚨吞吐講嘢時，乾咗會痛，每隔兩分鐘要飲水，如果唔飲會棘住好辛苦，痛到流眼水。𠵱家已好好多，最初係冇口水，日頭還好有分泌，到夜晚就冇，所以要食一隻藥，先含喺口，之後六個鐘會有一層箒喱包住，冇咁乾。」
跟發哥跑步
走過生死峽谷，達明直言人自然貪生惡死，但想到佛經所講的三千世，凡事變得輕可：「病當然會失去好多嘢，做唔到好多嘢，消失得太多喇。睇生死，一個愉快，一個悲慘咁簡單，生係美麗事，可能做到好多嘢，死不能避免，人有壽命。但諗遠啲，佛經有三千世，呢一生太簡單，既然有三千世，今世使乜咁緊張。」達明一向有讀佛經，跟他於2017年創作的舞台劇《塵上不囂》有關。
笑對病魔，達明回想病癒後擔任組合農夫的棟篤唱嘉賓，數到掌聲最多的，是自述火療經歷：「梅花針針灸插落臉、頸，已經辛苦，最辛苦仲係火療。」他憶述要赤裸全身背卧在按摩床上，由師傅為灑滿的火酒點火，着火一刻，達明不斷大叫「頂唔順」，他笑着說：「阿仔睇完之後話『爹哋，我頭先唔記得影相呀，燒多次吖！』呢一part係最多掌聲。」笑看生死，但同時積極面對人生，達明透露病癒後加入周潤發的行山跑步團，每次跑完都會向發哥報告。面對目前的疫情，作為長期病患的他，一向都有戴口罩外出的習慣，也會每隔一些時間添置日用品及買外賣返家。
「唔想太害怕」
另外，達明早前接受香港開電視節目《是敢的》主持梁梓禧訪問時，回想當年曾為患癌多次落淚，幸得好友吳鎮宇帶他看醫生，更感恩兩次在醫務所巧遇發哥，對方逼他跑步：「發哥話呢個係長跑，去到邊度拍戲都要跑，佢有時仲會遙距訓練，要我交功課。」從500米開始，到現在可跑3公里，他認為運動的重要，是磨練不放棄的心情：「我𠵱家病講畀大家知，就係唔想太害怕，要搵個動力畀自己。」