今天是張國榮逝世17周年，但因疫情關係，未能舉行悼念活動，是哥哥逝世以來的第一次。
《蘋果》找來油尖旺區尖沙嘴西區議員Leslie陳嘉朗講述他的Leslie；鄭敬基對着張國榮的心跳感覺；陳海琪不會忘記張國榮；娛記手足兼是鐵粉與真好人的張國榮的點滴，就是對張國榮的一片痴，「在我的心中你是那樣美；可會知、存在我心裏的一片痴，那份愛、那份美，願留住」，同時也是怪你過分美麗，「一想起你如此精細，其他的一切，沒一種矜貴。」
油尖旺區尖沙嘴西區議員陳嘉朗說：「我係Leslie陳嘉朗，我係油尖旺區尖沙嘴西區議員，亦都係張國榮嘅fans。」參與社運多年的Leslie，2009年因反對遷拆尖沙嘴碼頭巴士總站而組成「尖碼之聲」，去年6月發生逆權運動，Leslie被港人感動，決定在自己社運起點再出發，以民主派獨立參選人身份出戰區議會，更以偶像張國榮歌曲《共創真善美》為參選口號，最後成功當選；2003年哥哥離世，香港正值沙士，Leslie以fans身份到殯儀館悼偶像，今年17周年忌辰，香港卻有武肺，身份變了區議員的Leslie，仍然繼續寵愛張國榮！
首見偶像暈大浪
陳嘉朗於3歲開始鍾意哥哥，英文名都改做Leslie，「迷戀佢係由《Monica》、《不羈的風》開始，細個睇電視見到佢好靚仔好型仔，直到我第一次見佢，係佢告別樂壇演唱會，呢隻係我第一隻買嘅盒帶，我離開中學母校之後，佢先搬嚟母校隔鄰加多利山住，如果唔係我哋跑round school，可能有機會撞到佢，呢件事真係好可惜。」
Leslie暑期工時做記者，終於第一次有機會接觸哥哥，「當時佢拍緊《星月童話》，有次跟同事去探班，好近見到哥哥，嗰次講明唔做訪問，只係影相，因為好近見到佢，暈晒大浪，第一次見到男仔令我個心卜卜跳，觸電，唔識講嘢，只係識講四個字：『哥哥，呢邊。』呢張相係我親自影，一直咁多年都喺我身邊，擺咗喺我銀包，呢張相非常有回憶。」第二次也是最後一次見面，是蕭芳芳舉辦的護苗基金活動，「好記得嗰時都好近距離，哥哥有落嚟同大家握手，雖然冇合照到，但有握手好開心，走嘅時候喺停車場，佢坐Benz走同大家揮手，開心咗成晚。」
2003年4月1日，傍晚收到哥哥離世消息，「我仲記得喺屋企食緊飯，朋友打嚟問我有冇睇新聞，張國榮跳樓，我話愚人節唔好開玩笑，開收音機聽到播佢嘅歌，飯都食唔落，喊咗成晚，喊濕枕頭嗰隻，好心痛！過咗一兩日，粉絲自發去文華做集會，到哥哥出殯設靈，我有去殯儀館，仲被亞視訪問，嗰日落大雨排咗成個鐘入去，第二日上山專登請假送佢最後一程。」
原為公民教育歌
往後每年，文華獻花和康樂廣場公園默哀，Leslie都有參與，2013年開始，每逢哥哥忌辰Leslie更搞導賞團，帶哥迷重走哥哥的足迹，「每年帶朋友仔去張國榮拍過嘢或去過嘅地方，今年武肺取消悼念活動，我都希望做返少少嘢，希望大家唔好忘記哥哥，延續哥哥真善美助人精神，香港呢刻好需要大家團結抗疫。」忌辰前夕，Leslie送上50份防疫包去兒童癌病基金，「哥哥喺1997年演唱會出RED卡幫佢哋籌款，今年我將買花嘅錢慳落嚟，買咗搓手液，再加上之前有心人轉贈嘅物資，包成防疫包。」今日4月1日，他會在尖碼掛banner悼念偶像。
Leslie是現任油尖旺區議會（尖沙嘴西）區議員，去年首次報名參選時，以哥哥《共創真善美》歌詞作選舉口號，「哥哥，多謝你，好記得你1988年為港台公民教育運動作咗首歌《共創真善美》，結果我攞咗做選舉口號，英文版用《英雄本色》A Better Tomorrow，𠵱家香港疫情係好困難時期，我哋一定會同粉絲一齊撐住，發揚你同梅姐助人精神，延續你行善貢獻社會。」
後榮迷重遊足迹
這天，Leslie帶後榮迷重遊哥哥在尖沙嘴的足迹，包括哥哥常去飲下午茶的半島酒店、與唐鶴德邂逅的麗晶酒店、拍《色情男女》的電話亭位置、在電影《為你鍾情》錫李麗珍一啖後落車的巴士站。三位後榮迷都是90後，細說對哥哥的愛慕，「1999年哥哥攞榮譽大獎做咗一個壯舉，攞完獎後掟咗支咪落台，我喺嗰刻鍾意佢，好型。」、「2011年聽到電台播《怪你過分美麗》，用一晚時間搵晒哥哥所有資料，隔兩日完全對佢着迷。」、「我都係90後成員，喺YouTube發現哥哥，令我成為真正嘅後榮迷。」
撰文：余燕儀
攝影：仇志德