一個好消息，一個壞消息，你想聽邊個先？好消息係為咗抗疫，熱刺主席利維決定將主場變身「火神山」，將熱刺球場（圖）變成防疫中心，協助所屬社區受疫情影響嘅居民。不過壞消息係佢禮拜二通知球會所有非足球職員，一律減薪兩成，為期兩個月。利維係聲明仲話，要減同事薪水係一個好難嘅決定，但為咗保住成間球會550名非足球員工份工，決定所有非足球職員喺4月同5月都減薪兩成，就連高級行政人員都要減，佢仲講明，如果情況冇改善，五月後都要繼續減人工。利維話巴塞、拜仁同祖雲達斯都有減人工，所以佢都係跟大隊。佢仲希望英超同球員工會都好好傾吓，如果最後球員都同意減人工，大家先可以捱落去。